Ֆրանսահայերը կ՛աշխատին Ցեղասպանութեան ժխտումը քրէականացնող օրինագիծը ծերակոյտին ներկայացնելու ուղղութեամբ

Ֆրանսայի հայ համայնքը կը շարունակէ աշխատանքներ տանիլ Հայոց ցեղասպանութեան ժխտումը քրէականացնող նոր օրէնքի նախագիծը Ծերակոյտին ներկայացնելու ուղղութեամբ, եւ Հայաստանի նախագահ Սերժ Սարգսեանի այցելութիւնը Փարիզ այդ առումով կրնայ ուղղակիօրէն նպաստել այդ հոլովոյթին:

Փարիզի Հայ դատի գրասենեակի ղեկավար Հրաչ Վարժապետեան «Արմենփրես» լրատու գործակալութեան հետ ունեցած իր զրոյցին մէջ յայտնեց, որ Հայաստանի եւ Ֆրանսայի նախագահներուն հանդիպման ընթացքին պիտի քննարկուին նաեւ օրինագիծին հետ կապուած հարցերը եւ հայ համայնքին վերաբերող խնդիրներ: Ըստ Վարժապետեանի, նախագահներ Սերժ Սարգսեանի եւ Ֆրանսուա Հոլլանտի` նախագահական նստավայրին մէջ յառաջիկային տեղի ունենալիք հանդիպման պիտի յաջորդեն այցելութիւններ, ինչպէս նաեւ հանդիպումներ Ծերակոյտին մէջ:

Ֆրանսայի հայկական կազմակերպութիւններու համակարգող խորհուրդի համանախագահ Արա Թորանեան նշեց, որ Ֆրանսայի Ազգային ժողովի Ընկերվարական կուսակցութեան նախագահ Պրիւնօ Լէ Ռու իրենց պատուիրակութեան համանախագահներուն հետ հանդիպման ընթացքին վերահաստատեց կուսակցութեան` Հայոց ցեղասպանութեան ժխտումը քրէականացնող օրինագիծի ընդունման մտադրութիւնը: Լէ Ռու նշեց, որ իրենց սկզբունքներուն մէջ ոչինչ փոխուած է, Ֆրանսայի նախագահ Ֆրանսուա Հոլլանտ պէտք է յարգէ իր տուած խոստումը եւ Հայոց ցեղասպանութեան ժխտումը քրէականացնող նոր օրէնքի նախագիծը իրենք պէտք է առաջարկեն 24 ապրիլին ընդառաջ:

Ֆրանսայի Ազգային ժողովը 22 դեկտեմբեր 2011-ին, իսկ Ծերակոյտը` 24 յունուար 2012-ին ընդունեցին Հայոց ցեղասպանութեան ժխտման պատժելիութեան օրինագիծը, որ նախագահ Նիքոլա Սարքոզիի վաւերացման ներկայացուելէն առաջ խումբ մը թրքամէտ խորհրդարանականներու ջանքերով ներկայացուեցաւ Սահմանադրական դատարան եւ հակասահմանադրական նկատուեցաւ:

http://www.aztagdaily.com/archives/93527

Leave a Reply

Your email address will not be published. Required fields are marked *