Թուրքիայում թատերական արվեստի ոլորտում մրցանակներ սահմանող հայտնի Tiyatro Tiyatro ամսագիրը հայտնել է 2012 թվականին տարբեր անվանակարգերում մրցանակի հավակնող թեկնածուների անունները։
Ինչպես տեղեկացնում է Ստամբուլի հայկական «Ակօս»-ը, Tiyatro Tiyatro ամսագրի կողմից Ստամբուլի քաղաքային թատրոնում ներկայացված Հակոբ Պարոնյանի «Ատամնաբույժն արեւելյան» պիեսը միանգամից 5 անվանակարգերում է մրցանակի թեկնածու հայտարարվել։ 5 անվանակարգերի մեջ են «Լավագույն ներկայացում» եւ լավագույն ռեժիսոր» անվանակարգերը։
Նշենք, որ «Ատամնաբույժն արեւելյանը» ներկայացված է եղել Ստամբուլի քաղաքային թատրոնի 2011-2012 խաղացանկում։ Ներկայացումը ցուցադրվել է նաեւ Ադանայում։
Ներկայացման ռեժիսոր Էնգին Ալքանն ավելի վաղ նշել էր, թե ինքը տեղյակ է, որ հայերն են թուրքական թատրոնի հիմնադիրները, եւ ուրախ է, որ Թուրքիայում առաջին անգամ հայ հեղինակի պիեսն ինքն է բեմադրել։
