«Ձեռքիցս բռնիր և ինձ դուրս շպրտիր իմ գյուղից, ապա ողջ ունեցվածքս վաճառիր. դա ուղղակի անթույլատրելի է: Դա ո’չ օսմանյան խղճի կողմից է ընդունելի, ո’չ էլ` օսմանյան օրենքների»:

Ահմեդ Ռըզա (Օսմանյան սենատի նախագահը 1918 թ., երիտթուրքերի նախկին առաջնորդներից մեկը)

Թուրքական «Իլեթիշիմ» հրատարակչատունը լույս է ընծայել Թաներ Աքչամի և Ումիթ Քուրթի «Օրենքների ոգին. հետևել Ցեղասպանության հետքին` «Լքյալ գույքերի» մասին օրենքներում» վերնագրով գիրքը, որում օսմանյան օրենքների լույսի ներքո քննվում է Հայոց ցեղասպանության ընթացքում և հետո յուրացված հայկական ունեցվածքի խնդիրը:

Այդ մասին հաղորդում է Akunq.net-ը` հղում անելով «Իլեթիշիմ» հրատարակչության պաշտոնական կայքին:

Գրքում մեջբերված է նաև Հրանտ Դինքի հետևյալ խոսքերը. «… եթե հարց բարձրացվի, թե ում միջև է բաժանվել հայերից մնացած գույքը, և «ում ինչ է պատահել», դա շատ մեծ ցնցում կհարուցի: Քանզի կարժեզրկվի երկրին հարմարեցված մի ողջ պատմություն: Հասարակության մեջ կտարածվի այն գաղափարը, որ եթե այդ պատմությունը սխալ էր ներկայացվել, ուրեմն այլ բաներ էլ են սխալ պատմվել: Թուրքիայում կգրանցվի մի էական փոփոխություն»:

Akunq.net