Ադիլե Նաշիթ Օզջան

Ծնվել է 1930 թ. հունիսի 17–ին Ստամբուլում, մահացել` 1987 թ. դեկտեմբերի 11–ին: Ստեղծագործական գործունեությունը ծավալել է 1947-1987 թթ.: Ամուսինը Զիա Քեսքիներն է (1950-1982 թթ): Ադիլե Նաշիթը թուրքական կինոարվեստի գործիչ է, թատրոնի և հեռուստասերիալների դերասան:

 Կենսագրությունը

 Իրական անունը Ադիլե Քեսքիներ է: Բացի վերոնշյալ անունից՝ հայտնի է նաև Ադոշ, Մայր Ադիլե, Հեքիաթասաց մորաքույր անուններով: Իսկ առանձնահատուկ անունը Ադելա է: Թատերական ընտանիքից սերած Ադիլե Նաշիթի հայրը հայտնի կատակերգակ, քաղաքի կոմիկ հորջորջված Նաշիթն է, իսկ մայրը` հայկական թատրոնի դերասանուհի Ամելիա հանըմը: Ավագ եղբայրը` Սելիմ Նաշիթը, և իր ամուսինը` Զիա Քեսքիները, ևս թատերական գործիչներ են: Կինոյի աշխարհում Ադիլե Նաշիթը հայտի է դարձել Րըֆաթ Իլգազի «Հաբաբամի դասարանը» հայտնի ստեղծագործության հիման վրա էկրանավորված ֆիլմում ներկայացրած Մայր Հաֆիզեի դերով, ինչպես նաև` այն մայրերի դերերով, որոնք խաղացել է Մյունիր Օզքուլի հետ ներկայացրած  նկարահանումներում: Ադիլե Նաշիթը մահացել է 1987 թ. դեկտեմբերի 11–ին՝ իր ծննդավայր Ստամբուլում, 57 տարեկան հասակում` աղիների քաղցկեղի պատճառով: Թաղված է Ստամբուլի Քարաջաահմեդ գերեզմանոցում իր ամուսնու` Զիա Քեսքիների և որդու` Ահմեդ Քեսքիների հետ մեկտեղ:  

Նա թուրքական կինոյի անմոռանալի անուններից մեկն է՝ ներկայացումներում և ֆիլմերում ներկայացրած մոր՝ իր կերպարի և միայն իրեն հատուկ ոճի ու քրքիջի շնորհիվ: Հոր մահից հետո Ադիլե Նաշիթը թողնում է դպրոցը և 14 տարեկան հասակում աշխատանքի անցնում Ստամբուլի քաղաքային թատրոնում և Մանկական թատրոնում: Հալիդե Փիշքինի խմբակում «Ամեն ինչից մի քիչ» ներկայացումով մասնակցում է Ստամբուլի հյուրախաղերին: Ավելի ուշ Ադիլե Նաշիթն աշխատանքի է անցնում Մուամմեր Քարաջայի թատրոնում:

1948-1951 թթ. աշխատել է այն ընկերությունում, որը համատեղ հիմնել էին կատակերգակ Ազիզ Բասմաջըն և Վահի Օզը: Հետագայում` 1954 թ., վերադարձել է Մուամմեր Քարաջայի թատրոն, որտեղ աշխատել է մինչև 1960 թ.: 1961 թ. իր ամուսնու` Զիա Քեսքիների և ավագ եղբոր` Սելիմ Նաշիթ Օզջանի հետ միասին հիմնել են Նաշիթ թատրոնը, որի կազմալուծումից հետո` 1963 թ., Ադիլե Նաշիթը մտել է «Գազանֆեր Օզջան – Սրտի երկիրը» թատրոնը, որտեղ անընդմեջ աշխատել է մինչև 1975 թ.: Կինոյի մեջ առաջին անգամ մուտք է գործել 1947 թ., երբ խաղացել է Սեյֆի Հավաերիի նկարահանած «Վերք» ֆիլմում, սակայն ֆիլմերում ավելի շատ սկսել է   նկարահանվել 1970-ականներին: 1976 թ. «Այսպիսին է կյանքը» անունով ֆիլմում խաղացած իր դերով Անթալիայի «Ոսկե նարինջ» կինոփառատոնում ճանաչվել է տարվա լավագույն դերասանուհի:

Մեծ հեղինակություն է ձեռք բերել «Հաբաբամի դասարանը» հեռուստասերիալի շնորհիվ: 1978 թ. սկսել է խաղալ Միջազգային արվեստի ներկայացումների ընկերության կողմից բեմադրված թատերական և երաժշտական ներկայացումներում: Հետագայում խաղացել է Էրթեմ Էղիլմեզի և Քարթալ Թիբեթի նկարահանած ծիծաղաշարժ ֆիլմերում: Հեքիաթասաց մորաքույր է սկսել անվանվել`  1980 թ. «Քնելուց առաջ»  մանկական հաղորդումներում նկարահանվելուց հետո, որը ցուցադրվում էր TRT հեռուստատեսությամբ, և որի պրոդյուսերն էր Իլհան Շենգյունը (1946-2003 թթ.): Հեքիաթներ և պատմվածքներ ներկայացնող այս հաղորդումը շատ սիրված էր երեխաների կողմից:

 http://tr.wikipedia.org/wiki/Adile_Na%C5%9Fit

Leave a Reply

Your email address will not be published. Required fields are marked *