Թուրքիան դեմ է դուրս եկել իր սեփական Սահմանդրությանը, քանզի Սիրիայի «Ազատ բանակ»-ի զինյալներին տեղակայել է իր սահմաններին` առանց սեփական խորհրդարանի որոշման:«Արմենպրես»-ի փոխանցմամբ, այս մասին հոկտեմբերի 17-ին հրավիրված ասուլիսի ժամանակ ասաց թուրքագետ Հակոբ Չաքրյանը: «Թուրքիայի Սահմանադրության, եթե չեմ սխալվում, 67-րդ հոդվածն ասում է, որ Թուրքիայի սահմանին օտար զորքեր տեղակայելու համար անհրաժեշտ է Թուրքիայի խորհրդարանի որոշումը: Մինչդեռ, «Ազատ բանակ»-ի զինյալները տեղակայված են առանց այդ որոշման: Ստացվում է, որ Թուրքիան դեմ է դուրս եկել սեփական Սահմանադրությանը»,-ընդգծեց Չաքրյանը: Թուրքագետի խոսքով` Թուրքիան իր որդեգրած քաղաքականությամբ մեկուսացվել է իր իսկ դաշնակիցներից, «քանզի սխալը սխալի հետևից է թույլ տալիս և ոչնչի չի հասնում»:

Իսկ ինչ վերաբերում է Սիրիայում ստեղծված իրավիճակին, ապա թուրքագետի խոսքով, ստեղծվել է անվերահսկելի մի վիճակ, որի ելքը կանխատեսելի չէ: Չաքրյանը դժվարանում է կանխատեսել, թե որքան կդիմանա նախագահ Բաշար ալ Ասադը: «Չնայած արևմտյան ուժերը կողմ են Ասադի վարչակարգի տապալմանը, սակայն ոչ մի կտրուկ քայլի չեն դիմում` ելնելով որոշ գործոններից, որոնցից մեկը` Ռուսաստանի և Չինաստանի գործոնն է: Այս երկու երկրներն այլ մոտեցում ունեն, որով պաշտպանում են իրենց ռազմաքաղաքական դիրքերը տարածաշրջանում: Իսկ Թուրքիա-Սիրիա հարաբերություններում ամեն ինչ փոխվեց, և այժմ Թուրքիան Սիրիան տապալելու միտում ունի»,-ընդգծեց թուրքագետը:

Անդրադառնալով Մոսկվա-Դամասկոս ինքնաթիռի հետ կապված միջադեպին` Չաքրյանը նկատեց. «Թուրքիայի վարչապետ Ռեջեփ Թայիփ Էրդողանը հայտարարելուց առաջ, թե այդ ինքնաթիռում զենք է եղել, թող ցույց տա այդ զենքը»: Չաքրյանը համոզված է, որ Էրդողանի այս հայտարարությունն ուղղված էր Ռուսաստանի դեմ:

http://armenpress.am/arm/news/696595/turqian-ir-ardi-qaxaqakanutyamb-skhaly-skhali-hetevic.html