Պարթոլոմէոս սրբազան Հէյպէլիի դպրեվանքին մասին

«Այլեւս սպառեցաւ թէ’ մեր համբերութիւնը, թէ’ մեր շունչը»

«Րատիքալ»-ի աշխատակից Էզկի Պաշարանի ստորագրութեամբ հրատարակուած է յունաց Պարթոլոմէոս պատրիարքին հետ կատարուած հարցազրոյց մը, որուն գլխաւոր թէման է Հէյպէլիի դպրեվանքի անվերջանալի պատմութիւնը։ Հակառակ ինչ-ինչ խոստումներու ու լաւատես ենթադրութիւններու` դպրեվանքը փակ կը մնայ քառասուն տարիէ ի վեր ու Յունաց պատրիարքը կ՚ըսէ, որ այլեւս սպառած է թէ՞ իրենց համբերութիւնը, թէյ իրենց շունչը։

Հարցազրոյցը արդէն կատարուած է դպրեվանքի սրահին մէջ, ուր պատրիարքը ընդունած է քանի մը ակադեմականներ ու լրագրողներ։ Յունաց պատրիարքը սրտնեղ էր ու խիստ կը խօսէր, որովհետեւ այլեւս ձանձրացած էր լսելէ խոստումներ, որոնք բնաւ ալ չէին իրականանար։ Սրբազանը կը յիշեցնէր Աթաթիւրքին այն խօսքը, թէ գիտութիւնը ամէնէն վստահելի առաջնորդն է, եւ դպրեվանքին փակուած ըլլալը վնաս կը պատճառէ ոչ թէ միայն յոյն համայնքին, այլ բովանդակ Թուրքիոյ։ Կարելի չէ արժէքաւոր հոգեւորականներ հասցնել, դուրսէն հոգեւորակա՞ն կանչենք, հարց կուտար Պարթոլոմէոս սրբազան։ Մնաց, որ դպրեվանքին փակ մնալը մարդու իրաւունքներու բռնաբարում ալ է։ Դպրեվանքը ատենին արժէքաւոր շրջանաւարտներ տուաւ, բոլորն ալ Պարթոլոմէոսի տարեկիցներն են, նոյնիսկ աւելի մեծ, մօտ ատենէն անոնք պիտի քաշուին կամ պիտի մահանան, այն ատեն ի՞նչ պիտի ըլլայ։

Թէ ինչո՞ւ դպրեվանքին բացման արտօնութիւն չի տրուիր, սրբազանն ալ չի գիտեր եւ կը խորհի, որ հանրային կարծիքը այլեւս պատրաստ է տեսնելու, որ դպրեվանքը կը վերաբացուի։ Կառավարութիւնը ծածուկ կերպով փոխադարձութեան սկզբունք կը գործադրէ, եթէ Աթէնքի մէջ մզկիթ բանան, մենք ալ դպրեվանքը կը բանանք, կ՚ըսուի, մինչդեռ մարդու իրաւունքի հարցին մէջ փոխադարձութիւն չի փնտռուիր։ Պարթոլոմէոս յիշեցուց, որ վերջերս Ճէ-Հէ-Փէի կուսակցապետ Քըլըճտարօղլուին հետ ալ խօսեցաւ այս մասին եւ խնդրեց որ գոնէ այս խնդրին մէջ նախաձեռնութիւնը անոնք ձեռք առնեն։ Փոքրամասնութիւններու դէմ ամէնէն մեծ անիրաւութիւնները կատարուեցան Ճէ-Հէ-Փէի շրջանին, ուստի այս անգամ գոնէ այդ կուսակցութիւնը դրական կեցուածք թող ցուցաբերէ, բայց Քըլըճտարօղլու տուաւ խուսափողական պատասխաններ, ըսաւ սրբազանը։

Կառավարութիւնը քանիցս յուսադրեց, կարծես կանանչ լոյս վառեց, խոստումներ ըրաւ, բայց այս բոլորը արդիւնք չտուին։ «Րատիքալ»-ի թղթակիցը կը գրէ, որ յառաջիկայ օրերուն փաստաբանները, գլուխ գլխի տալով պատրիարքարանի հետ, տարբեր ռազմավարութիւն մը պիտի գործադրեն դպրեվանքի հարցի կապակցութեամբ։

ՀԷՅՊԷԼԻԻ ՄԷՋ ՀՐԴԵՀ

Հէյպէլիի յունաց դպրեվանքը երէկ հրդեհի վտանգ մըն ալ անցուց կղզիին եղեւիններու շրջանին մէջ պատահած հրդեհի մը հետեւանքով։ Հրդեհը շուտով տարածուեցաւ փչող ուժեղ հովուն պատճառաւ, բոցերը հասան մինչեւ դպրեվանքի դռները, բայց հաղորդուեցաւ, որ դպրեվանքը վնասուած չէ որեւէ կերպով։ Հրդեհը մարելու աշխատանք տարին 6 սաւառնակներ ու մէկ ուղղաթիռ։ Հրկիզուեցաւ 2,5 արտավար տարածութիւն։

Leave a Reply

Your email address will not be published. Required fields are marked *