«Մենք չենք ապրում այն Թուրքիայում, որում բնակվում է Շիրինօղլուն»

Վարչապետ Էրդողանի հետ հանդիպած և որպես հայկական համայնքի առաջնորդ ներկայացված Պետրոս Շիրինօղլուի կատարած մեկնաբանությունները մի խումբ հայերի հակազդեցության տեղիք են տվել:   

Շինինօղլուն վարչապետ Էրդողանի հետ հանդիպել էր մարտի 26-ին:

Bizbaskabirturkiyedeyasiyoruz.blogspot.com կայքէջում մի խումբ հայերի կողմից համատեղ տեքստ է տեղադրվել, որպեսզի ստորագրել ցանկացող Թուրքիայում բնակվող հայերն իրենց ստորագրությունը թողնեն դրա տակ: Այդ մի խումբ հայերը տեքստում շեշտում են, որ Սուրբ Փրկիչ հայկական հիվանդանոցի հոգաբարձուների խորհրդի նախագահ Պետրոս Շիրինօղլուն չի հանդիսանում «հայկական համայնքի նախագահը», բացի այդ` նրանք իրենց առարկություններն են արտահայտում Շիրինօղլուի խոսքերի առնչությամբ:

Թալին Սուջիյան. «Մենք  ունենք ընտրությունների միջոցով կազմվող հաստատության ավանդույթ»

Տեքստի տակ ստորագրածներից մեկը` Թալին Սուջիյանը, հետևյալն ասաց թուրքական http://www.ntvmsnbc.com լրատվական կայքէջին տված հարցազրույցում. «Այստեղ ամենամեծ խնդիրն այն է, որ հայկական համայնքը չունի քաղաքացիական ներկայացուցիչ: Հայկական համայնքը տարբեր գաղափարներ ունի, բայց մենք չունենք մի այնպիսի մեխանիզմ, որը կկարողանա դրանք արտահայտել: Մենք խնդրահարույց ենք համարում այն հանգամանքը, որ մեր կողմից չընտրված ոմն մեկը համայնքի անունից հանդես է եկել որպես ներկայացուցիչ»:

Սուջիյանը հայտնելով, որ հայկական համայնքը մինչև 1920-ական թվականներ ունեցել է կրոնական գործերով զբաղվող «Հոգևոր խորհուրդ» և աշխարհիկ խնդիրները լուծող «Աշխարհիկ խորհուրդ», և որ այս երկու խորհուրդներում էլ տարին մեկ անգամ ընտրություններ էին կատարվում, նաև տվեց հետևյալ մեկնաբանությունները. «Բացի վերոնշյալներից` կար նաև, այսպես կոչված, «Ազգային կենտրոնական վարչություն», որը 7 տարբեր հանձնաժողովներից բաղկացած ու ընտրությունների արդյունքում նշանակվող անդամներով արտահայտված մի կառույց էր: Այս կառույցը վերացվեց 1960 թ. հեղաշրջումից հետո: Մի խոսքով` մենք պատմականորեն ունենք քաղաքացիական, ընտրությունների միջոցով կազմվող հաստատությունների ավանդույթ»:

«Մենք չունենք որևէ խողովակ»

Սուջիյանը հետևյալ ձևով մանրամասնեց վերոհիշյալ համատեղ հայտարարության տակ նշված «հավասար քաղաքացի» շեշտադրումը. «Մեզ համար շատ կարևոր է վաքըֆային անշարժ գույքերի վերադարձը: Հայկական դպրոցները պետությունից աջակցություն չեն ստանում: Փլված է այն վաքըֆի տնտեսական հիմքը, որի անշարժ գույքը բռնագրավված է: Մեզ այդ կալվածքները պետք են: Այդ պատճառով էլ շատ կարևոր է վաքըֆային հողերի վերադարձը: Նմանապես անհրաժեշտ է, որպեսզի դասագրքերը մաքրվեն հայերից վրեժ առնելու մղող խտրական արտահայտություններից: Մեկ ուրիշ խնդիր է պաշտոններ ստանալու հարցը: Միշտ որպես օրինակ հետևյալ արտահայտությունն է բերվում. «Աղբահավաք անգամ չենք կարողանում դառնալ»:

Մեկ այլ ցուցանիշ է այն, որ մենք չունենք մեզ ներկայացնող պատգամավոր: Դրա պատճառն այն է, որ փոքրամասնությունները չունեն քաղաքացիական և, միևնույն ժամանակ, քաղաքական խողովակ, որը կկարողանար արտահայտել նրանց շահերը: Ինչպես որ Թուրքիայում քիչ է կին պատգամավորների թիվը, նմանապես հետ ենք նաև փոքրամասնություններին ներկայացնող պատգամավորների հարցում»:

http://www.ntvmsnbc.com, 02.04.2010

Leave a Reply

Your email address will not be published. Required fields are marked *