Հիլարի Քլինթոնի Հայաստան, Ադրբեջան և Թուրքիա այցելություններից հետո սենսացիոն հայտարարություն է արել Թուրքիայի նախագահը:
Պարզվում է, որ Լեռնային Ղարաբաղի բանակցություններում կան լայն հասարակությանն անհայտ թուրքական հեղինակությամբ գործընթացներ, որոնք վստահություն են ներշնչում Աբդուլլահ Գյուլին, որ Ադրբեջանը ետ է ստանալու «իր գրավվյալ բոլոր տարածքները»:
«Գրավվյալ տարածքներ» ասելով` Գյուլն ի նկատի ունի նաև Լեռնային Ղարաբաղը:
Թուրքիայի նախագահ Աբդուլլահ Գյուլն իր տիկնոջ հետ Իգդիրում մասնակցել է մարզպան Ամիր Չիչեկի պատվին կազմակերպված հրապարակային միջոցառմանը: Ելույթ ունենալով հավաքվածների առջև` Թուրքիայի նախագահը հայտարարել է, որ իրենք լրջորեն պայքարում են Կովկասում կայուն խաղաղություն հաստատելու համար:
«Մենք ամեն ինչ անում ենք դրա համար: Դուք մի մասը գիտեք, մի մասը չգիտեք: Ադրբեջանն անպայման իր գրավվյալ տարածքները կազատի և փոխադարձաբար անցյալը կմոռացվի»,- հայտարարել է Գյուլը:
Հիշեցնենք, որ 2011թ-ին վարչապետ էրդողանը ևս նախընտրական այցի ժամանակ Իգդիրում նշել էր, որ Թուրքիան ամեն ինչ անում է Լեռնային Ղարաբաղի հարցում Ադրբեջանին աջակցելու նպատակով:
«Դուք միայն մեր արածի մի փոքր մասն եք տեսնում ու տեղեկանում»,- հայտարարել էր Էրդողանը իր կուսակիցների հանրահավաքի ժամանակ:
Սակայն այն ժամանակ Էրդողանը հույս չէր հայտնել, որ Ադրբեջանը կարող է ետ ստանալ «գրավվյալ տարածքները»: Իսկ այժմ Գյուլը վստահություն է հայտնում, որ Ադրբեջանը ետ կվերադարձնի ոչ միայն «գրավվյալ տարածքները», այլ ետ կվերդարձնի «բոլոր գրավվյալ տարածքները»:
Հայաստանի սահմանագծին նման հայտարարությունները կարող են հրահրիչ որակավորվել, մանավանդ այս օրերին, երբ հայ հասարակությունը սգում է իր զոհված զինվորների համար և Ադրբեջան, Ալիև, Թուրքիա և Գյուլ բառերը միայն նյարդայնացնում են:
Արմեն Արազ
