Ֆրանսացի պատմագէտներու միութիւնը դէմ է Հայկական ցեղասպանութեան օրէնքին

«Ազատութիւն՝ պատմութեան համար» կոչուած Միութիւնը, որուն նախագահն է Ֆրանսացի պատմաբան Փիէր Նորա, եւ որուն զանազան երկիրներէ կ՚անդամակցին մօտաւորապէս երեք հազար պատմաբաններ, մտահոգ է, որ յառաջկայ ամիս Ֆրանսայի Խորհրդարանը դարձեալ կրնայ օրակարգի բերել Հայկական ցեղասպանութեան ժխտումը յանցագործութիւն նկատող օրէնք մը։

Միութեան Նախագահ Փիէր Տորա Միութեան անդամներուն ղրկեց ելետրական նամակ մը, որով ան յայտնեց, թէ 2 յունիսին Փարիզի մէջ պիտի գումարուի արտակարգ ժողով մը, որուն օրակարգին վրայ դրուած պիտի ըլլայ Հայկական ցեղասպանութեան օրէնքը։ («Հայթերթ» կայքէջը, որ արձագանգ կը հանդիսանայ այս լուրին, իրմէ կ՚աւելցնէ,, թէ շատ զարմանալի է որ յիշեալ Միութեան անդամակցող պատմաբանները բնաւ անհանգիստ չեն Հրէական Ողջակիզման ուրացումը յանցագործութիւն նկատող Կէյսօթ օրէնքէն եւ ատոր փոխարէն անհանգիստ են նոր օրէնքէն, որուն մէջ Հայկական ցեղասպանութեան մասին ալ չի խօսուիր, եւ որ բոլոր ցեղասպանութիւններու մասին է)։

Փիէր Նորա իր ելեկտրական նամակին մէջ դիտել կուտայ, որ նորընտիր Նախագահ Հոլանտ Յունիսի երեսփոխանական ընտրութիւններէն անմիջապէս վերջ դարձեալ օրակարգի պիտի բերէ ցեղասպանութեան ուրացումը յանցագործութիւն նկատող օրէնք մը, որ այս անգամ Մայր Սահմանադրութեան ակնկալած պայմաններն ալ պիտի յարգէ ու ընդունելի պիտի նկատուի։ Նորա յիշեցուց, որ ասիկա խոստում մըն է, զոր Հոլանտ ըրած էր նախագահ ընտրուելէ առաջ։

Ֆրանսացի իրաւագէտ ու նախկին դատական նախարար Ռոպէր Պատինթէր, որ դէմ է Հոլանտի նախատեսած օրէնքին, իր տեսակէտները պիտի պարզէ ժողովի ընթացքին։ Ելոյթ պիտի ունենայ նաեւ Իտալացի պատմաբան Լուիճի Գաժանի, որ պիտի պատմէ, թէ Եւրոմիութեան անդամակցող երկիրները ինչեր ըրած են Եւրոմիութեան օրէնքները իրենց օրէնքներուն պատշաճեցնելու համար։

«Ազատութիւն պատմութեան համար» Միութեան ժողովը պիտի կայանայ Փարիզի մէջ Յունիսի երեսփոխանական ընտրութիւններէն մէկ շաբաթ առաջ։

Leave a Reply

Your email address will not be published.