Երրորդ օրն է` Իրանը արգելել է ադրբեջանական բեռնատարների մուտքն իր տարածք և բարձրացրել է 5-օրյա վիզայի արժեքը ավտոմեքենաների և բեռների համար:

Ինչպես հաղորդում է ադրբեջանական ANS գործակալությունը, մայիսի 22-ից Իրանն առանց որևէ բացատրության արգելել է ադրբեջանական բեռնատարների մուտքն իր տարածք: Ավտոբուսները և մարդատար ավտոմեքենաները կարողանում են անարգել անցնել ադրբեջանա-իրանական սահմանը:

Հաղորդվում է նաև, որ Ադրբեջանի և Իրանի միջև սահմանային Բիլյասուվար անցակետում կուտակվել են տասնյակ ադրբեջանական բեռնատարներ, որոնք չեն կարողանում մուտք գործել Նախիջևան: Վերջին շրջանում Ադրբեջանի և Իրանի միջև լարվածությունը հասել է այն մակարդակին, որ Իրանը ստիպված է օգտագործել որոշ լծակներ, որպեսզի «տնտեսական դաս տա իր մեծամիտ հյուսիսային հարևանին»:

Եւս մի շաբաթ այսպիսին իրավիճակի շարունակության դեպքում Նախիջևանը կարող է առաջին անհրաժեշտության ապրանքների լուրջ պակասություն զգալ:

Եթե Իրանի տարածքը փակ մնա ադրբեջանական բեռնատարների համար, ապա Նախիջևանի համար նախատեսված բեռները պետք տարանցվեն Վրաստանով, Թուրքիայով և միայն Նախիջևանի ու Թուրքիայի միջև Դիլուճու անցակետով մտնեն Ադրբեջանի տարածք: Այս դեպքում բեռնափոխադրումների արժեքը կարող է կրկնակի աճել:

Սա շատ լուրջ ու ազդեցիկ պատժամիջոց է, որ կարող է երկար ժամանակով կիրառել Իրանը, եթե Ադրբեջանը չփոխի իր վերաբերմունքը հարավային հարևանի նկատմամբ և չդադարեցնի խաղարկել այսպես կոչված «Հարավային Ադրբեջանի» խաղաքարտը:

Վերջին իրադարձությունները ցույց են տալիս, որ Իրանի կողմից Բաքվում իր դեսպանի ետկանչը պատահական քայլ չէր, և Թեհրանը շատ լուրջ է վերաբերվում Ադրբեջանի հակաիրանական քաղաքականությանը:

Եթե Ադրբեջանը մոտ ապագայում չվերանայի իր արտաքին քաղաքականությունը, ապա Ռուսաստանի քաջալերմամբ Իրանը կարող է նաև այլ ազդեցիկ քայլեր ձեռնարկել:

Հիշեցնենք, որ երկու օր առաջ Ռուսաստանի պաշտպանական գերատեսչությունն իր դժգոհություն էր հայտնել Ադրբեջանի իշխանություններից` Գաբալայի ռադիոլոկացիոն կայանի շուրջ բակացություններում կոշտ դիրքորոշում ցուցաբերելու և վարձակալության դիմաց անտրամաբանական գումար պահանջելու համար` 300 մլն դոլար:

Armweeklynews