Թուրքիայում բնակվող հայերը շարունակում են խոսել իրենց հայկական ծագման մասին և թուրքական իշխանություններից պահանջել հայկական սեփականությունները: Ինչպես հաղորդում է «Արմենպրես»-ը` թուրքական Evrensel պարբերականի թղթակից Էլիֆ Գյորգուն իր հոդվածում խոսում է այն մասին, որ հայերը ոչ մի կերպ չեն հրաժարվում իրենց հայրենիքից և շարունակաբար վերադառնում են այնտեղ:
«Հողի և մարդու միջև տարօրինակ կապ գոյություն ունի: Մարդը մարդուց կարող է կտրվել, բայց հողից «պոկվել» տարօրինակ կերպով չի հաջողվում: Հողին տրված աշխատանքը, քարի վրա գրված պատմությունը տարօրինակ կերպով մարդուն հանգիստ չեն տալիս: Նույնը կատարվում է Անատոլիայից «պոկված» հայերի հետ»,- գրում է Գյորգուն իր հոդվածի սկզբում: Լրագրողը խոսում է այն մասին, որ տարբեր վայրերում գտնվող հայկական եկեղեցիները, գերեզմանատները վերադարձնելու նպատակով հայերը ակտիվ աշխատանքներ են սկսել տանել: Նա խոսել է Բիթլիսի, Բաթմանի, Մուշի, Վանի, Ստամբուլի նահանգների և Սասունի գավառի հայերի սոցիալական օգնության և մշակութային համագործակցության ընկերության նախագահ, ծագումով սասունցի Ազիզ Դաղջըի հետ:
Դաղջըն, ում գործունեության շնորհիվ արդեն մեծ թվով հայկական եկեղեցիներ և գերեզմանատներ են հայտնաբերվել և վերադարձվել իրենց օրինական տերերին, խոսել է այն մասին, որ հայկական հողերը շատ հաճախ խնդրո առարկա են դառնում հենց թուրք գյուղապետերի կամ գավառապետերի միջև: «Գյուղապետերն իրենք անգամ չեն կարողանում հայկական գերեզմանատների, եկեղեցիների հարցում համաձայնության գալ: Մեկն ասում է` իմն է, մյուսը թե` իմն է: Արդյունքում մեկը այն վերածում է ախոռի, մյուսը` պահեստի»,- նշում է Դաղջըն: Վերջինս հայտարարել է, որ որքան էլ բարդ լինի, միևնույն է` իրենք շարունակելու են պայքարը հայկական սեփականության վերադարձի համար:
«Ահա թե ինչ է նշանակում Անատոլիայում, Միջագետքում հայ լինելը: Ոչ ապրողը հանգստություն ունի, ոչ մահացածը…»,- եզրակացնում է հոդվածի հեղինակը:
