Էրտողան Կը Սպառնայ Թուրքիա Գտնուող Հայաստանցիները Վտարել

17 Մարտ, 2010

 ԼՈՆՏՈՆ.- Թուրքիոյ վարչապետ Ռեչեփ Թայիպ Էրտողան, որ Անգլիա կը գտնուի մասնակցելու համար Թուրքիա-Անգլիա աշխատաժողովի մը, հաստատեց, թէ Անգլիոյ Ժողովուրդներու պալատը բացարձակապէս պիտի չվաւերացնէ Հայկական Ցեղասպանութեան բանաձեւը։ Այս մասին երաշխաւորած է Անգլիոյ Արտաքին Նախարար Ճէք Սթրովէն, որ վստահեցուցած է վարչապետ Էրտողանը, թէ այդ բանաձեւին վաւերացման հաւանականութիւնը զերօ է։ Անգլիոյ խորհրդարանի Ժողովրդական պալատի անդամներուն թիւը 651 է, իսկ հայկական բանաձեւին թիկունք կանգնած է ցարդ մէկ երեսփոխան, ըսած է ան։

 Վարչապետ Էրտողան այս առթիւ յայտնած է, որ Անգլիոյ արտաքին գործոց նախարարին երաշխաւորութիւնը անվաւեր կը դարձնէ շրջող շշուկները։ Էրտողան լրագրողի մը հարցումին պատասխանելով՝ ըսած է, թէ այս զարգացումը նոր վնաս պիտի չպատճառէ ԱՄՆ-Թուրքիա յարաբերութիւններուն։

 «ԱՄՆ-Թուրքիա յարաբերութիւնները բացարձակապէս պայմանաւորուած չեն Թուրքիա-Հայաստան յարաբերութիւններով, Թուրքիա ու ԱՄՆ ռազմավարական գործընկերներ են», ըսած է Էրտողան։
 Հակառակ այս դրական զարգացումին, վարչապետ Էրտողան «Պի.Պի.Սի.»ին հետ ունեցած հարցազրոյցի մը ընթացքին անդրադարձած է Թուրքիոյ մէջ փախստական կարգավիճակով աշխատող հայաստանցիներուն, եւ հակասելով մէկ օր առաջ արտաքին գործոց նախարար Տաւութօղլուի յայտարարութեան՝ ըսած է, որ Թուրքիա կրնայ վտարել, իր գնահատումով, շուրջ հարիւր հազարի հասնող հայաստանցիները։

 «Ես ստիպուած չեմ զանոնք պահելու երկրիս մէջ։ Անոնք, որոնք Հայաստանը կը սիրեն, թող արգելք ըլլան զանազան երկիրներու խորհրադարաններէն ներս սարքուած հանդէսներուն։ Անոնք, որոնք Հայաստանը կը սիրեն, օրինակ՝ Ֆրանսան, Ամերիկայի Միացեալ Նահանգները, Ռուսիան, թող օգնեն, որպէսզի Հայաստան փրկուի Սփիւռքի ճնշումներէն», յայտնած է Էրտողան:

 «Այսինքն՝ հայաստանցիները կը հեռացնէ՞ք Թուրքիայէն, այդպէ՞ս ըսիք». այս հարցումին Էրտողանի պատասխանը եղած է՝ «Եթէ պէտք ըլլայ։ Բայց հարկաւ ասիկա այսօր-վաղը չէ»։
 «Միլլիյէթ», որ այս հարցազրոյցին մասին մանրամասնութիւններ կու տայ, կը յիշեցնէ, թէ վարչապետ Էրտողան նախապէս «ԹՌԹ-1» հեռատեսիլի կայանէն ալ խօսած էր Թուրքիոյ մէջ աշխատող հայաստանցիներուն մասին եւ ըսած էր, որ Թուրքիա աչք կը գոցէ անոնց կեցութեան՝ մտածելով, որ անոնք նեղութիւններ ունին իրենց երկրին մէջ։

 «Մենք իրենց հետ ալ խօսեցանք, մեզի խնդրանքներ ներկայացուցին, բայց կան որոշ բաներ, զորս չենք կրնար ընել առանց օրէնքներու վրայ հիմնուելու։ Բայց ի՞նչ մեղք, որ դուրսինները չեն խօսիր մեր այս բարեացակամութեան մասին», նախապէս ըսած էր Էրտողան։

 Մեկնած վարչապետին վերոյիշեալ խօսքերէն՝ «Միլլիյէթ» կը յիշեցնէ Թուրքիոյ մէջ բնակող հայաստանցիներուն մասին Եւրասիոյ համագործակցութեան հիմնարկին կողմէ կատարուած ուսումնասիրութիւնը, որ հիմնուած է Հայաստանէն Թուրքիա եկած եւ աշխատած 200 գաղթականներու հետ կատարուած հարցազրոյցներու վրայ։ Ըստ այս ուսումնասիրութեան, Թուրքիոյ մէջ աշխատող հայաստանցիներուն թիւը 100 հազար չէ, ինչպէս կը պնդուի, այլ պարզապէս 10 հազար է։ Մէկ ամիս առաջ հրապարակուած սոյն ուսումնասիրութեան համաձայն, գաղթականներուն 96 տոկոսը կին է եւ անոնց 93 տոկոսը՝ փախստական է, կեցութեան արտօնագիրը (վիզան) լրացած։ 3 տոկոսը կանոնաւոր կերպով կը նորոգէ իր վիզան, 4 տոկոսն ալ թրքահպատակներու հետ ամուսնացած ու իր կեցութիւնը օրինականացուցած է։

http://www.asbarez.com/arm/archives/74500

Leave a Reply

Your email address will not be published. Required fields are marked *