Փելին Բաթուի արցունքները

Փելին Բաթուն նորից իր դրոշմը թողեց «Պատմության ետնաբեմում» հաղորդման մեջ… Ո’չ, այս անգամ չքնեց, այլ երկու անգամ լաց եղավ: Ճիշտ այն ժամանակ, երբ հաղորդումը լքելու համար պայուսակն էր հավաքում, հաղորդումն ընդմիջվեց գովազդով: Հաղորդման թեման Հայոց ցեղասպանության պնդումներն էին… Տիգրան Քարագյոզյանը` որպես սովորական հայ քաղաքացի, անում էր շատ կարևոր մեկնաբանություններ: Նրա հոգսը այն հարցը քննարկելը չէր, թե ցեղասպանություն եղել է, թե ոչ: Պատմում էր երեխաների, մայրերի ապրած ողբերգությունների մասին: Այնպիսի մի օրինակ տվեց, որ Փելինը չկարողացավ արցունքները զսպել: Քարագյոզյանը պատմում էր, որ մի հայ մայր, տեղահանության ճանապարհին բռնաբարության չենթարկվելու համար, իրեն վերք էր հասցրել ոտքերի արանքում: Այդ պահին Փելինի աչքերից սկսեցին արցունքներ հոսել…

Ցավը կիսել

Երբ  youtube կայքէջում կարդում էի Փելինի արցունքների կապակցությամբ գրված այն մեկնաբանությունը, թե «Հայի ծնունդ Փելին Բաթու, այդ դեպքում ս. եղիր-գնա այստեղից, ապրիր Հայաստանում: Բա ամոթ չէ՞, մարդ էլ հայի համար լաց լինի՞: Ամենալավ հայը մեռած հայն է», միտս եկան Քարագյոզյանի խոսքերը: Քարագյոզյանը Փելինի աչքերից արտասուքներ քամած օրինակը տալուց առաջ ասել էր. «Որպեսզի այս ցավերը չկրկնվեն, պետք է կարդանք, տեղեկանանք դրանց մասին: Թե չէ դրանք նորից կկրկնվեն»:

Մի շատ դժվարին ժամանակաշրջան ենք անցկացնում ողջ երկրով մեկ, վիրավորվում է մեր հպարտությունը: Եթե ինձ հարցնեք, կասեմ, որ այն մարդիկ, ովքեր քննարկում են ցեղասպանության եղած լինել-չլինելու հարցը, քարտեզում Հայաստանի, Արևելյան Անատոլիայի տեղը ցույց տալ անգամ չեն կարողանա: Սակայն մենք` որպես ԶԼՄ-ների ներկայացուցիչներ, մեծ խնդիրներ ունենք այս լուրերը ներկայացնելու մեր ոճի առնչությամբ: Ցեղասպանության քվեարկությունների առաջացրած զայրույթի և ատելության զգացումը մեզ տանում է շատ վատ բաների, որոնց օրինակներից մեկն էլ youtube կայքէջում տեղ գտած մեկանաբանությունն է:

 Լա’վ, եկեք ամեն ինչ անենք` «ցեղասպանության» անիրավացի խարանից ազատվելու համար: Ինչպես որ ասում են մեր բյուրոկրատները` «Թո’ղ պատմաբանները և ոչ թե խորհրդարանները քննարկեն այն խնդիրը, թե ցեղասպանություն եղել է, թե ոչ», բայց կա մի ճշմարտություն. հարյուր հազարավոր հայ քաղաքացիներ կորցրել են իրենց կյանքը: Ըստ իս` Փելինի արցունքները մարդկության արժանապատվության արցունքներն էին: Այդ արցունքները պիտի խորհրդանշական լինեն: Նախ ցավը կիսենք, եթե անգամ չենք ընդունում ցեղասպանության մեղադրանքը…

Մեվլյութ Թեզել   http://www.sabah.com.tr, 15.03.2010

Leave a Reply

Your email address will not be published. Required fields are marked *