Թող Թուրքիան ներողություն խնդրի Հայաստանից

Տարօրինակ առաջարկ` Խաղաղություն և ժողովրդավարություն կուսակցության պատգամավորից. «Թող Թուրքիան ներողություն խնդրի Հայաստանից»:

Խաղաղություն և ժողովրդավարություն կուսակցության և Բիթլիսի պատգամավոր Մեհմեդ Նեզիր Քարաբաշը խոսեց Թուրքիայի` 1915 թ-ի դեպքերը որպես ցեղասպանություն ընդունելու և Հայաստանից ներողություն խնդրելու անհրաժեշտության մասին:

Թող Թուրքիան ներողություն խնդրի

Պատգամավոր Քարաբաշը, որը Խաղաղություն և ժողովրդավարություն կուսակցություն է մտել Թուրքիայի սահմանադրական դատարանի կողմից “Ահաբեկչական կազմակերպության հետ կապեր ունեցող և ազգի ու ամբողջականությանը սպառնացող գործողություններ կատարող մի կենտրոնի վերածված լինելու” մեղադրանքով Ժողովրդավարական հասարակություն կուսակցության վերջնականապես փակվելուց հետո, անդրադառնալով շաբաթվա մեջ ԱՄՆ Ներկայացուցիչների պալատի արտաքին հարաբերությունների հանձնաժողովի կողմից ընդունված Հայկական բանաձևին, նշեց, որ իրենք կարևորում են այդ որոշումը և առաջ քաշեց Թուրքիայի կողմից Հայաստանից ներում հայցելու գաղափարը:

Այն, որ այս հարցը քննարկվում է Ներկայացուցիչների պալատում, ամոթ է այս երկրի համար:

Խաղաղություն և ժողովրդավարություն կուսակցության Իզմիրի նահանգային նախագահությունում ելույթ ունեցած Քարաբաշը հայտնեց, որ այս շաբաթ տեղի են ունեցել երկու շատ կարևոր իրադարձություններ, որոնցից առաջինը ԱՄՆ-ի կայացրած հայկական որոշումն էր, իսկ մյուսը` տարբեր եվրոպական երկրներում կազմակերպված գործողությունները:

Մեհմեդ Նեզիր Քարաբաշը հետևյալն ասաց այդ կապակցությամբ. «Բոլոր քրդական կազմակերպությունները Եվրոպայում` Roj TV հեռուստաալիքի գլխավորությամբ, ենթարկվում են ճնշումների. ճնշումներ բանեցվեցին մեր այնտեղի բյուրոյի վրա, ձերբակալվեց ավելի քան 20 մարդ: Մենք կարևորում ենք նաև ԱՄՆ-ում ընդունված հայկական բանաձևը: Համոզված ենք, որ դա մի նախազգուշացում էր` ուղղված Թուրքիայի պետությանն ու քաղաքական գործիչներին, որպեսզի վերջիններս լուծեն առկա խնդիրները: Այն դեպքում, երբ Թուրքիայում կան այնպիսի բազմաթիվ խնդիրներ, ինչպիսիք են քրդական հարցը, հավատքի խնդիրը և այլն, այս երկրում երբեք չեն քննարկվել անցյալում հայտնի ժողովուրդների, հատկապես հայերի հետ առնչվող իրադարձությունները, դրանք ընդունվել են որպես տաբու: Այն դեպքում, երբ տարիներ շարունակ այս երկրում տեղի ունեցածը պահանջում էր, որպեսզի մենք բոլորս` պետական պաշտոնյաների գլխավորությամբ, ներողություն խնդրենք, ներում հայցենք այդ կոտորածների համար (դրանք անվանեք, ինչպես կուզեք` ցեղասպանություն կամ կոտորած) և այդ խնդիրը մեր երկրի ներսում ու հայերի հետ քննարկելով` լուծենք, Թուրքիան չի անում դա, և այն, որ ամեն տարի, երբ մոտենում է ապրիլի 24-ը, այս հարցը քննարկվում է ԱՄՆ-ի ու եվրոպական երկրների խորհրդարաններում, ամոթ է բոլոր նրանց համար, ովքեր պետության անունից ասում են, թե այս ժողովրդի ներկայացուցիչներն են»:

Թե’ քուրդ և թե’ հայ…

Քարաբաշը, նշելով, որ Թուրքիան պետք է լուծի իր խնդիրները, ասաց նաև հետևյալը. «Դեպքեր, որոնց մի մասը տեղի է ունեցել անցյալում, մյուսը գալիս է օսմանյան ժամանակաշրջանից, մի մասն էլ` Միություն և առաջադիմություն կուսակցության մտայնությունից: Եթե այս խնդիրները մեր երկրում բացահայտ կերպով քննարկվեն, և պարզվի, որ անհրաժեշտ է ներողություն խնդրել, ապա պետք է տվյալ ժամանակաշրջանում կատարվածի համար ներում հայցել թե’ թուրք, թե’ քուրդ և թե’ հայ ժողովուրդներից և դրանք բացահայտորեն բարձրացնել միջազգային պլատֆորմներում»:

Roj TV հեռուստաալիքը փակելով` չեք կարող լռեցնել քուրդ ժողովրդին

Քարաբաշը, եվրոպական երկրներում ՊԿԿ ահաբեկչական կազմակերպությանն ուղղված գործողությունները մեկնաբանեց որպես «ճնշում քուրդ ժողովրդի կազմակերպությունների վրա» և հետևյալն արձանագրեց. «Roj TV հեռուստաալիքը փակելով` չեք կարող լռեցնել քուրդ ժողովրդին, որովհետև քրդերն այն հիմնել են, որպեսզի շատ դժվարին պայմաններում անգամ այն աշխատի: Այդ իսկ պատճառով էլ քրդերը մինչև վերջ տեր են կանգնելու այդ հաստատությանը»:

http://www.haber27.com/news_detail.php?id=53625

Leave a Reply

Your email address will not be published. Required fields are marked *