Թուրքիայի առաջատար մամուլը, այդ թվում` CNNTurk հեռուստաալիքն ու «Անատոլու» լրատվական գործակալությունն անդրադարձել են Հայաստանի Հանրապետության արտաքին գործերի նախարար Էդվարդ Նալբանդյանի` հայկական հեռուստաալիքներին տված հարցազրույցին, որում նա ասել է, որ «եթե Թուրքիան իրապես ցանկանում է օգնել Լեռնային Ղարաբաղի հակամարտության լուծման գործընթացին, պետք է հնարավորինս հեռու մնա այդ գործընթացից»:

Ինչպես հաղորդում է «Արմենպրես»–ը, թուրքական մամուլը նշում է, որ Ֆրանսիայի Սենատում Հայոց ցեղասպանության ժխտումը քրեականացնող օրինագծի ընդունման կապակցությամբ ԼՂ խնդրի կարգավորման հարցով ԵԱՀԿ Մինսկի խմբի համանախագահությունից Ֆրանսիային հեռացնելու վերաբերյալ Թուրքիայի արտաքին գործերի նախարար Ահմեդ Դավութօղլուի արած հայտարարությունը Էդվարդ Նալբանդյանը «ուլտիմատում» է բնութագրել:

«Նշելով, որ նման վերջնագրերը որեւէ արդյունք չեն կարող տալ, Հայաստանի արտգործնախարարն ընդգծել է, որ Սենատում վավերացված օրենքը որեւէ երկրի դեմ չէ, եւ Ցեղասպանության ճանաչումը Հայաստանի արտաքին քաղաքականության գերակայություններից մեկն է», -հայտնում է թուրքական մամուլը:

30.01.2012

Armenpress.am