Այսօր Թուրքիայի հետ ոչ մի գաղտնի կամ անգաղտնի բանակցություններ չեն ընթանում. ոչ ուղղակի, ոչ էլ` միջնորդված: Այս մասին հեռուստաընկերություններին տված հարցազրույցում հայտարարել է Հայաստանի ԱԳ նախարար Էդվարդ Նալբանդյանը:
Հարցին, թե Ֆրանսիայի Սենատի ցեղասպանությունների ժխտումը քրեականացնող օրենքն ընդհանրապես կդրդի՞, որպեսզի Թուրքիան ավելի կոշտացնի դիրքորոշումը հայ-թուրքական սահմանը բացելու հարցում, թե՞ սա կստիպի, որպեսզի Թուրքիան վերանայի իր կոշտ դիրքորոշումը եւ փորձի հայ-թուրքական գործընթացը սառեցրած վիճակից դնել որոշակի ռելսերի վրա, հատկապես, որ լուրեր տարածվեցին, որ ինչ-որ գաղտնի բանակցություններ են դարձյալ եղել, Նալբանդյանը պատասխանեց. «Այսօր Թուրքիայի հետ ոչ մի գաղտնի կամ անգաղտնի բանակցություններ չեն ընթանում. ոչ ուղղակի, ոչ էլ` միջնորդված: Չեն տարվում այն պարզ պատճառով, քանի որ դա հնարավոր կլինի անել, երբ որ Թուրքիան պատրաստ լինի ինչ-որ գործնական քայլերի: Իր այս քաղաքականությունը հեռանկարներ չունի: Ժամանակը քաղաքականության, պատմության համար շատ հարաբերական բան է, ինչքան կտեւեն այս դրսեւորումներն իրենց կողմից, կերեւա: Բայց մի բան պարզ է՝ Թուրքիան չի կարող ընդմիշտ սահմանները փակել, ընդմիշտ ժխտողականությամբ զբաղվել, պայմանագրեր ստորագրել եւ չհարգել, չվավերացնել այդ պայմանագրերը: Ես նշել եմ, եւս մեկ անգամ կհիշեցնեմ, որ դիվանագիտության, միջազգային հարաբերությունների մեջ ամենակարեւոր սկզբունքը pacta sunt servanda սկզբունքն է՝ ստորագրված, ձեռք բերված պայմանավորվածությունները պետք է հարգվեն: Անգամ մարդկային հարաբերություններում, եթե որեւէ մեկի հետ ինչ-որ բան ես պայմանավորվում, եւ այդ անձը չի կատարում, չի հարգում պայմանավորվածությունները մեկ անգամ, երկու անգամ, որովհետեւ այդպես Թուրքիան ոչ միայն Հայաստանի հետ է պայմանավորվել եւ չի հարգել: Հասկանում եք, ինչ վերաբերմունք է առաջանում: Իսկ Թուրքիայի ամպագոռգոռ հայտարարությունների մասով. գիտեք, երբ փաստարկներ չկան, երբ բան չունեն ասելու, իհարկե աղմուկ են հանում»:
Հարցին, թե մեր միջազգային գործընկերների մոտ կա՞ այն ընկալումը, որ Թուրքիան չի հարգում այդ պայմանավորվածությունները, ԱԳ նախարարն արձագանքեց. «Դուք կասկածո՞ւմ եք: Եթե այդպես չլիներ, ապա կարեւորագույն երկրների ներկայացուցիչները մամլո ասուլիսների ժամանակ, ներառյալ նաեւ Հայաստանում, չէին ասի, որ գնդակը գտնվում է թուրքական դաշտում»:
Իսկ հայ-թուրքական արձանագրությունների քննադատների փաստարկների վերաբերյալ, ըստ որոնց` եթե այդ արձանագրությունները չվավերացվեն, հայ-թուրքական հարաբերությունները ավելի կվատթարանան, Ցեղասպանության միջազգային ճանաչումը կկանգնի, այդ գործը կվիժեցվի, եւ Թուրքիան կունենա ավելի ակտիվ դերակատարում ԼՂ հարցում, Նալբանդյանն ասաց. «Այս փաստարկները մեկնաբանեցին բազմիցս թե մեր թերթերում, թե արտասահմանում, թե հենց Թուրքիայում: Իհարկե դա լուրջ չէ, եւ այս կարգի փաստարկները չեն դիմանում որեւէ քննադատության»:
