ԱՄՆ դատարանը Անգարան կանչեց իբրեւ հայերու հայցին պատասխանող կողմ

Լոս Անճելըսի դաշնային շրջանային դատարանը (2 Օգոստոսին) որոշում կայացուցած է Թրքական իշխանութիւններուն դէմ երեք հայերու ներկայացուցած հայցին առնչութեամբ, ուր Անգարային ստիպած է դատական գործընթացին դառնալ պատասխանող կողմ: Այս մասին կը հաղորդէ Հայկական յիշատակութեան կեդրոնը` դատարանի այս որոշումը անուանելով “Հայկական դիմող կողմի վաղաժամ յաղթանակ”ը սպասուելիք ծանր դատական ճակատամարտին: Դատարանը մեղադրուող կողմին պարտադրած է մինչեւ 19 Օգոստոս ներկայացնել պաշտպանութիւնը:

ԱՄՆ-ի մէջ բնակող խումբ մը հայեր՝ Դեկտեմբեր 2010ին հայց ներկայացուցած էին ընդդէմ Թուրքիոյ կառավարութեան եւ երկրի երկու խոշոր դրամատուներու` Կեդրոնական դրամատան եւ Գիւղատնտեսական դրամատան:

Երեք հայերու անունով հայցը՝ Լոս Անճելըսի դատարան ներկայացուցած է փաստաբան Վարդգէս Եղիայեան: Հայցուորները, որոնց մէջ է նաեւ փաստաբանի կինը, Թուրքիոյ կառավարութենէն՝ իրենց պապերու կորսնցուցած ունեցուածքին համար՝ կը պահանջեն 63 միլիոն 900 հազար տոլարի փոխհատուցում:


“Թուրքիոյ կառավարութեան, Կեդրոնական դրամատան եւ Գիւղատնտեսական դրամատան դէմ հայց ներկայացուցած երեք հայերը թրքական իշխանութիւններէն կը պահանջեն 63.9 միլիոն տոլարի փոխհատուցում: Ատանայի մէջ անոնց նախնիներուն պատկանած է 49,5 հեկտար հողատարածք, ներառեալ` Ինճիրլիքի ամերիկեան ներկայ ռազմակայանի տարածքը: Այս ամէնը անոնց նախնիներէն խլուած է 1915ին: Իսկ Թուրքիան Ինճիրլիքի ռազմակայանը տրամադրելով Միացեալ Նահանգներուն` մեծ եկամուտներ ապահոված է իրեն համար”,– հայցը ներկայացնելէ առաջ յայտարարած էր փաստաբան Վարդգէս Եղիայեան:

Նշենք, որ այս հայցը որեւէ առնչութիւն չունի “Դաւոյեանի հայց” անունով յայտնի այլ դատական գործի մը հետ, որ Յուլիս 2010ին խումբ մը ամերիկաբնակ հայեր ներկայացուցած էին ընդդէմ Թուրքիոյ կառավարութեան, Կեդրոնական դրամատան եւ Գիւղատնտեսական դրամատան: Հայցը նախաձեռնած են լոսանճելըսաբնակ Կարպիս Դաւոյեանն ու նիւեորքաբնակ Հրայր Թուրապեանը:

Tert.am

Leave a Reply

Your email address will not be published. Required fields are marked *