Վանում ևս մեկ եկեղեցի է վերանորոգվելու

«HyeTert»-ի փոխանցմամբ Վանի նահանգապետ Մյունիր Քարալօղլուն ասել է, որ Բաշքալեում գտնվող Սուրբ Բարդուղիմեոս եկեղեցին (ենթադրվում է, որ կառուցվել է 3-րդ դարում) զբոսաշրջության նպատակներով վերանորոգվելու է:

Նահանգապետ Քարալօղլուն տեղում ուսումնասիրել է Բաշքալեյի Ալբայրաք գյուղում գտնվող 3-րդ դարում կառուցված Սուրբ Բարդուղիմեոս եկեղեցին: Քարալօղլուն նկատելով, որ պահպանվել են եկեղեցու արտաքին պատերն ու վրայի մոտիվները, համապատասխան ատյաններին կարգադրել է եկեղեցին վերանորոգել և բացել կրոնական արարողությունների ու զբոսաշրջության համար:

Քարալօղլուի կարգադրությունից հետո Նահանգային հատուկ վարչության պաշտպանության, կիրառության և փորձարկման բաժնից մի խումբ է այցելել Սուրբ Բարդուղիմեոս եկեղեցի և վերանորոգման ու վերանախագծման համար զեկույց է պատրաստել:

Սուրբ Բարդուղիմեոս եկեղեցին

Ալբայրաք գյուղում գտնվող Սուրբ Բարդուղիմեոս եկեղեցու կառուցման տարեթիվը հայտնի չէ, սակայն որոշ տեսակետների համաձայն` կառուցվել է 3-րդ դարում: Ուղղանկյուն նախագծով կառուցված եկեղեցու հիմնական պատերը զարդարված են հարուստ զարդանախշերով:

Այսօր կառույցը շրջանում համարվում է բացառիկ քրիստոնեական կրոնական կոթող: Սուրբ Բարդուղիմեոս եկեղեցում 1915 թ. ի վեր պատարագ չի կատարվել, դադարել է լինել գործող եկեղեցի, սակայն նահանգապետ Քարալօղլուի կարգադրությամբ սկսվել են չափագրման, վերանախագծման և վերանորոգման աշխատանքները:

Leave a Reply

Your email address will not be published.