ՏԱՅՈՑ ՔԱՐ

ՏԱՅՈՑ ՔԱՐ. ամրոց և բնակավայր Տայք նահանգի Ճակք գավառում: Եղել է Մամիկոնյանների տոհմի տիրույթների կենտրոններից: Հայտնի է Տայոց քարի (Թավուսքարի) եկեղեցին` երկաստիճան պատվանդի վրա բարձրացող, ութախորան, կենտրոնագմբեթ հորինվածքով: Գմբեթատան բոլորակ տարածությունը շրջափակում են հատակագծում ուղղանկյուն ութ խորշեր, որոնցից արևելյանը` Ավագ խորանը (երկու կողմերում անկանոն եզրագծով ավանդատներով), ունի կիսաշրջանաձև ավարտ: Գմբեթի ութնիստ թմբուկը բարձրանում է ներսի կիսաբոլորակ ութ որմնասյունները միմիյանց կապող գմբեթակիր կամարների վրա: Արտաքուստ խորանների միջև կան եռանկյունաձև «հայկական խորշեր»: Մուտքերը երեքն են` հյուսիսից, հարավից և արևմուտքից: Եկեղեցու (այժմ`կիսավեր) կառուցումը Թ.Թորամանյանը վերագրել է Ներսես Գ Իշխանցի կաթողիկոսի (641-661թթ.) ժամանակներին:

Հայկական համառոտ հանրագիտարան, Հատոր 4, Երևան, 2003:

Leave a Reply

Your email address will not be published.