Օջալանը բանակցել է իշխանությունների հետ. Քուրդ պատգամավորները կարող են երդում տալ

Թուրքիայի Իմրալը կղզում ցմահ բանտարկված Աբդուլլահ Օջալանն իր փաստաբանների հետ հերթական հանդիպման ժամանակ հայտնել է, թե թուրքական իշխանությունների հետ պայմանավորվածություն է ձեռք բերել՝ ստեղծել Խաղաղության խորհուրդ, որը պետք է ստեղծվի մեկ ամսվա ընթացքում։

Firat գործակալության փոխանցմամբ՝  PKK-ի առաջնորդը նշել է, թե իշխանությունների հետ համաձայնեցրած Խաղաղության խորհուրդը չի լինելու ոչ պետական, ոչ էլ հասարակական մի կառույց։ «Խաղաղության խորհուրդն աշխատելու է խաղաղություն հաստատելու  եւ խնդրի կարգավորման համար։ Այն կկազմավորվի մեկ ամսվա ընթացքում»,-նշել է Օջալանը։

Անդրադառնալով քրդական «Խաղաղություն եւ ժողովրդավարություն» (BDP) կուսակցության պատգամավորների բոյկոտին, Օջալանը նշել է, թե ինքը չգիտի՝ այդ ճգնաժամը կլուծվի՞, թե՞ոչ։ «Սակայն BDP-ն չպետք է ուրիշի խաղերի գործիքը դառնա։ Ինչպես որ նախկինում եմ ասել, նրանք կարող են իշխանությունների հետ համաձայնության գալ եւ երդվել։ Այդ համաձայնությունն անպայման պետք է լինի, քանի որ այն կարեւոր է»,-նշել է Օջալանը՝ շեշտելով, որ երկրորդ կարեւոր քայլը պետք է լինի Սահմանադրական խորհրդի ստեղծումը, որը կիրականացնի Սահմանադրության հետ կապված աշխատանքներ։

Նշենք, որ Թուրքիայի բարձրագույն ընտրական խորհրդը վետո է դրել Դիարբեքիրից ընտրված քուրդ պատգամավոր Հաթիփ Դիջլեյին գրանցել, որից հետո քրդական «Խաղաղություն եւ ժողովրդավարություն» կուսակցությունից առաջադրված անկախ պատգամավորները հայտարարեցին, որ բոյկոտում են խորհրդարանի աշխատանքները։  

09.07.2011

Լուրեր Հայաստանից – NEWS.am

Leave a Reply

Your email address will not be published. Required fields are marked *