Հրէական Մամուլը Էրտողանէն Կը Պահանջէ Ներողութիւն Խնդրել Հայերէն

ԻՍՐԱՅԷԼ, «Փանորամա».- «Արդեօք Իսրայէլը պէ՞տք է ներողութիւն խնդրէ Թուրքիայէն», իր յօդուածներէն մէկուն մէջ այս հարցը կը բարձրացնէ «Jerusalem Post» պարբերականի յօդուածագիր Տեպորա Տանան: Լրագրողին կարծիքով, ներողութիւն խնդրելու Թուրքիոյ պահանջքը ուրիշ բան չէ, եթէ ոչ՝ սադրանք: Հեղինակը համամիտ է խօսքերուն Իսրայէլի արտաքին գործոց նախարար Աւիկտոր Լիպըրմանի, որ Քնեսեթի Արտաքին յարաբերութեանց եւ պաշտպանութեան յանձնաժողովներուն հետ հանդիպման ժամանակ ըսած է. «Կարիք չկայ ներողութիւն խնդրելու Թուրքիայէն. այդպիսի բան ընել՝ կը նշանակէ ստորացուած ըլլալ»: Ան նաեւ նշած է, թէ Թուրքիան կը պահանջէ ներողութիւն խնդրել, որպէսզի հետագային կարենայ այդ հանգամանքը օգտագործել իբրեւ տարածաշրջանին մէջ սեփական ուժ ցուցադրելու աժան քաղաքական միջոց:

Յօդուածագիրը կ՛աւելցնէ, որ նման դիւանագիտական «ներողութիւնները» շատ երկար կը մնան հանրային յիշողութեան մէջ, եւ կը յաւակնին պատմական իրադարձութեանց արժէք ունենալ: «Jerusalem Post»ը կը յիշեցնէ Թուրքիոյ վարչապետ Էրտողանին, թէ Իսրայէլէն ներողութիւն պահանջող Անգարան, ի սկզբանէ մերժեց Առաջին Համաշխարհային պատերազմին ընթացքին 1.5 միլիոն հայերու կոտորած իրականացնելուն համար՝ հայ ժողովուրդէն ներողութիւն խնդրելու գաղափարը, եւ աւելին, ան կը շարունակէ մերժել Ցեղասպանութեան փաստը:

«Նախքան Իսրայէլի կողմէ Կազայի շրջափակումով մտահոգիլը, նախ եւ առաջ, Թուրքիա պէտք է մտածէ այն մասին, որ արդէն 16 տարի է ինչ շրջափակման մէջ կը պահէ Հայաստանը», կը գրէ հեղինակը եւ դիմելով Թուրքիոյ վարչապետ Էրտողանին՝ կ՛ըսէ. «Ձեր պետութեան արիւնալի էջերը կոծկելու փորձեր ընելու փոխարէն, մաքուր թուղթ վերցուցէք եւ փորձեցէք նոր էջ բանալ Ձեր պետութեան պատմութեան մէջ: Երբեք չէք գիտեր, կրնայ ըլլալ եթէ քիւրտերէն ու հայերէն ներողութիւն հայցէք, ատիկա պիտի խթանէ Իսրայէլին՝ հետեւելու Ձեր օրինակին»:

http://asbarez.com/arm/104125/

Leave a Reply

Your email address will not be published. Required fields are marked *