40 տարեկանում հասկացավ, որ հայ է

40 տարեկանում հասկացավ, որ հայ է: Իր «Վախենում եմ, մայրի’կ» երգով ճանաչում ստացած բողոքավոր երգիչ Յաշար Քուրթը 40 տարեկան հասակում ուսումնասիրություններ սկսեց և հասկացավ, որ հայ է: Ուշագրավ է նրա պատմությունը…

Բավականին երկար ժամանակ է, ինչ մեր օրակարգում է «Ներողություն ենք խնդրում» արշավը:  Բանը հասավ նրան, որ անգամ քննարկվեց Թուրքիայի նախագահ Աբդուլլահ Գյուլի հայ լինել-չլինելու հարցը: Գյուլն ասաց, որ իր ընտանիքը մահմեդական է և թուրք, բայց Հանրապետական ժողովրդական կուսակցության պատգամավորներից Ջանան Արըթմանը, ցեղապաշտության մեջ չափազանցության հասնելով, Գյուլին առաջարկեց ԴՆԹ-ի տեստ անել: Գիտեմ` այս թեմաները մեզ համար հավելյալ ծանր խնդիրներ են, սակայն այս հարցն ունի նաև իր արվեստի կողմը, իհարկե` նաև մարդկային չափանիշները…

Իմացավ 40 տարեկանում

«Վախենում եմ, մայրի’կ» կրկներգով մեր հիշողությունների մեջ պահպանվող հակառազմապաշտ երգիչ Յաշար Քուրթը «Թարաֆ» շաբաթաթերթին տված իր հարցազրույցում հայտնեց, որ իր հայ լինելու մասին իմացել է 40 տարեկանում:

Մենք որտեղի՞ց ենք եկել Սև ծով

Չափազանց ուշագրավ է Յաշար Քուրթի հետ պատահածը. «Մի օր իմ և Արտոյի /Թունջբոյաջյան/ միջև շատ հետաքրքիր խոսակցություն եղավ: Արտոյին ասացի, թե շատ նման է հորը, նա էլ հետևյալն ասաց. «Դու էլ ես հորս նմանվում»: Մտքովս հետևյալն էր անցնում. «Չէ՞ որ Արտոն հայ է, մենք չենք կարող ազգականներ լինել»: Մանկուց հորս հարցնում էի, թե որտեղի՞ց ենք եկել Ռիզե, բայց նա միշտ փոխում էր թեման՚:

Ուսումնասիրեց իր տոհմածառը

ՙԱրտոյի հետ ծանոթանալուց հետո սկսեցի այս թեման նորից ուսումնասիրել…»: Պարզվում է` հայտնի երգիչը հետագայում իր շատ տարեց ազգականին հարցրել է, թե «Մենք որտեղի՞ց ենք եկել Սև ծով»: Եվ ստացել է հետևյալ պատասխանը. «Մեր պապերի և օսմանցիների միջև հարաբերությունները փչացել են, Վանից եկել են Սև ծով»: Որից հետո սկսել է ուսումնասիրել իր տոհմածառը` որպես դեդեկտիվ և տեղեկացել հետևյալ փաստի մասին.

Թաքցրել են, որպեսզի ապրի       

Քուրթի պապիկի ծնողներն սպանվել են, և պապն այդ ժամանակ եղել է 10 տարեկան: Պապիկն այնուհետև ոտքով հասել է Ռիզե և օթևան գտել մի ընտանիքի մոտ: Նրա հետագա սերունդները նույնպես ստիպված են եղել ապրել` նրա նման թաքցնելով իրենց ինքնությունը: Քուրթը դրա պատճառը հետևյալ կերպ է բացատրում. «Քանի որ ամենից առաջ պետք էր ողջ մնալ»:

Հիմա հայերեն է սովորում

Քուրթն այժմ սկսել է հայերեն սովորել: Ըստ էության, այլևս կարիք չկա այլ բան ասելու: Մենք էլ Ադիլե Նաշիթի հայ լինելու մասին իմացանք միայն մեծանալուց հետո, այն Նաշիթի, որի «գառնուկներս» ասելուն էինք սպասում փոքր եղած ժամանակ:

Յաշար Քուրթը թուրքական ռոք երգիչ է: Ծնվել է 1968 թվականին Ստամբուլում: 1974-1989 թվականներին Ստամբուլում ստացել է տարրական, միջնակարգ ու լիցեյի կրթությունը: Հայտնի է իր հակառազմապաշտ դիրքորոշմամբ:

haber50.com        20.09.2009

Leave a Reply

Your email address will not be published. Required fields are marked *