Փասատինայի յուշարձանի ցուցանակներուն բացման արարողութիւնը՝ ապրիլ 21ին

ՓԱՍԱՏԻՆԱ, «Փասատինա Նաու».- Քալիֆորնիոյ նահանգային Ծերակոյտի անդամ Էնթընի Փորթանթինոյի եւ Հայոց Ցեղասպանութեան Փասատինայի յուշարձանի յանձնախումբին համատեղ ջանքերով, շաբաթ, ապրիլ 21ին, երեկոյեան ժամը 5էն սկսեալ տեղի պիտի ունենայ թիւ 210 ազատուղիի Ֆեր Օքս ելքերուն վրայ՝ Հայոց Ցեղասպանութեան Փասատինայի յուշարձանին վայրը մատնանշող չորս ցուցանակներու բացման արարողութիւը։

Յիշեցնենք, որ Փասատինայի «Մեմորիըլ» զբօսայգիի հիւսիս-արեւելեան բաժինը գտնուող Հայոց Ցեղասպանութեան Փասատինայի յուշարձանին պաշտօնական բացումը տեղի ունեցած էր Ցեղասպանութեան հարիւրամեակին՝ 2015ի ապրիլին:

Հայոց Ցեղասպանութեան Փասատինայի յուշարձանը ազատուղիին վրայ ծանուցելու նպատակով, Փորթանթինօ անցեալ տարի ներկայացուցած էր թիւ 25 բանաձեւը, որ վաւերացուեցաւ նահանգի օրէնսդիր մարմինին կողմէ։

Փորթանթինօ, որ նախապէս եղած էր Հայոց Ցեղասպանութեան Փասատինայի յուշարձանի յանձնախումբի անդամ, նշած է, որ ցուցանակները պիտի նպաստեն Հայոց Ցեղասպանութեան իրազեկուածութիւնը ընդարձակելուն՝ միաժամանակ յիշեցնելով, որ մարդկութեան հանդէպ յանցագործութիւններուն դէմ պայքարը մնայուն գործընթաց է, որ շարունակական ուշադրութիւն կը պահանջէ:

Asbarez.com

Leave a Reply

Your email address will not be published. Required fields are marked *