Ոչ ոք թող կասկած չունենա՝ մենք հոգևորականներով կլուծենք խնդիրը․Արամ Աթեշյանն ու Սահակ Մաշալյանը՝ Պոլսո պատրիարքարանի շուրջ եղած զարգացումների վերաբերյալ

Պոլսո պատրիարքարանի միաբան, Թուրքիայի կողմից Պոլսո պատրիարքի փոխանորդ ճանաչվող Արամ արքեպիսկոպոս Աթեշյանի խոսքով՝ իրենք հոգևորականներով կլուծեն Պոլսո պատրիարքի ընտրությունների հարցը:

«Ոչ ոք այդ հարցում թող կասկած չունենա,- Tert.am-ի հետ զրույցում ասաց նա՝ հավելելով,- բայց մյուս կողմից էլ պետությանը հպատակվել պարտավոր ենք: Պատրիարքական աթոռի հիմնադրումը պետության ձայնով է եղել. դա անուրանալի է, պատրիարքական աթոռը պետությունն է հիմնել: Հետևաբար, պետության դեմ չենք կարող գնալ, չենք կարող մերժել»:

Ավելի վաղ հայտնել էինք՝  Ստամբուլի նահանգապետարանում կայացել  է Թուրքիայի հայ համայնքի հիմնադրամների ղեկավարների և իշխանության ներկայացուցիչների հանդիպումը՝ կապված Պոլսո Հայոց պատրիարքի ընտրությունների կազմակերպման հետ:

Ստամբուլի հայկական «Լույս» ամսագրի խմբագիր Շահնուր Քազանջըի տեղեկությունների համաձայն՝ ժողովի ժամանակ թուրքական պետության ներկայացուցիչները վերահաստատել են Պոլսո Հայոց պատրիարք ընտրված տեղապահ Գարեգին արքեպիսկոպոս Բեկչյանին այդ պաշտոնում չճանաչելու և պատրիարքի ընտրությունների կազմակերպումն անհնարին որակող նամակի բովանդակությունը, որը նախօրեին ուղղվել էր պատրիարքարանին Ստամբուլի նահանգապետարանի կողմից:

Արամ արքեպիսկոպոս Աթեշյանը հաստատեց այդ տեղեկությունը: Նշեց, որ մի քանի օրվա մեջ այդ հարցը կլուծվի հոգևորականների միջև:

Հարցին՝ ինքն անձամբ չի՞ ցանկանում, որ Պոլսո պատրիարք ընտրվի, Արամ սրբազանը պատասխանեց՝ ժամանակը գա, կընտրենք պատրիարք: «2010 թ. եկեղեցական համագումարը որոշել էր, որ նոր պատրիարք պետք է ընտրել միայն պատրիարքի հանգստյան կոչվելուց հետո: Հետևաբար, պետությունը մեր որոշման հիման վրա է այս քայլին գնում»,- նշեց նա:

Tert.am-ը Պոլսո պատրիարքական ընտրությունների հարցի՝ փակուղի մտնելու շուրջ զրուցել է նաև Պոլսո պատրիարքարանի միաբան, կրոնական ժողովի ատենապետ Սահակ եպիսկոպոս Մաշալյանի հետ, որը  ժամանակին նաև հրապարակային մեղադրել էր այն ժամանակ Պոլսո պատրիարքի փոխանորդ համարվող Արամ արքեպիսկոպոս Աթեշյանին՝ պատրիարքի ընտրությունների անցկացմանը խոչընդոտելու մեջ:

«Ստամբուլի նահանգապետարանում արդեն պաշտոնապես ասացին, որ դեռ նոր պատրիարք ընտրելու առիթ չկա: Առողջական պատճառները առիթ չեն պատրիարք փոխելու համար, հետևաբար, պատրիարքի փոխանորդը, որը պատրաստում է ընտրությունների գործընթացը, իրենք չեն ճանաչում: Ասել են՝ իրենք ճանաչում են այն վիճակը, երբ Արամ Աթեշյանն ընդհանուր փոխանորդ էր»,- նշեց նա՝ հավելելով, որ թուրքական իշխանությունները հիմա որպես պատրիարք ճանաչում են կոմայի մեջ գտնվող Մեսրոպ արքեպիսկոպոս Մութաֆյանին:

Սահակ Մաշալյանը համաձայնեց դիտարկման հետ, որ դատարանն ընդունել է, որ պատրիարքը անգործունակ է, հանգստյան է կոչվել,  բայց Թուրքիայի իշխանություններն իրենց որոշումն այնուամենայնիվ մեկնաբանում են՝ մեջբերելով սահմանադրության այն կետը, որ միայն պատրիարքի մահվան դեպքում կարելի է ընտրել նոր պատրիարք:

Հարցին, թե ինչ են հիմա պատրաստվում անել պատրիարքարանում, Սահակ սրբազանը պատասխանեց․ «Մենք պատշաճ կազմակերպություններ ունենք՝ կրոնական ժողով, եկեղեցական ժողով, աշխարհականաց ատենապետների ժողով․ բոլորս պետք է իրար գլխի հավաքվենք, խոսենք, ճամփա գտնենք, Թուրքիայում կրոնի, խղճի ազատության մասին օրենքներից օգտվելով՝ խնդրից դուրս գալու ճանապարհ պետք է ընտրենք»:

Դիտարկմանը, թե հավանականությունը երևի թե ավելի մեծ է, որ Պոլսո պատրիարքարանը կլքի պատրիարքական ընտրությունների համար պատրիարքի տեղապահ ընտրված Գարեգին արքեպիսկոպոս Բեքչյանը, քան թե Թուրքիայի իշխանությունների ցանկությունը չկատարվի, Սահակ Մաշալյանը պատասխանեց․

«Գարեգին սրբազանը մեր միաբանն է: Նույնիսկ եթե տեղապահ չլինի, իրավունք ունի պատրիարքարանում մնալու: Բայց շատ հավանական չէ, որ նա տեղապահի աթոռին մնա»,- ասաց նա՝ նշելով, որ ավելի հավանական է, որ Թուրքիայի իշխանությունների ցանկությունը կատարվի, քան Մայր աթոռի, որը Պոլսո պատրիարքի տեղապահ է ընդունում Գարեգին Բեքչյանին:

Սահակ սրբազանի խոսքով՝ մոտ ապագայում իրենք մտադիր չեն բախվելու Թուրքիայի իշխանությունների հետ: «Մեր շահերին դեմ է պատերազմը: Մեր վիրավոր եկեղեցին ավելի կտկարանա: Վեհափառ հոր հետ էլ ենք խոսում, նրա հետ կապի մեջ ենք: Ինքն էլ է հաշտությանը կողմ, որովհետև զգում է՝ ճանապարհը դա է»,- ասաց նա:

Հարցին, թե արդյոք նա տեսնում է Արամ արքեպիսկոպոս Աթեշյանի միջամտությունը՝ նահանգապետարանի որոշման մեջ, Սահակ սրբազանը պատասխանեց․ «Առանձին իր միջամտության հույսը չունեմ․պետության կամքն էլ կա այդտեղ: Այս գործընթացն առաջին անգամ է, որ լինում է, անփորձ ենք այս հարցում, և մարդ ամբաստանելու համար էլ ի վիճակի չենք»:

Հարցի առնչությամբ Tert.am-ը պարզաբանում ստացավ նաև Մայր Աթոռ Սուրբ Էջմիածնի
Տեղեկատվական համակարգի տնօրեն Տ. Վահրամ քահանա Մելիքյանից։

«Բնական է, որ այս գրությանն անդրադարձ պիտի ունենան Պատրիարքարանի եկեղեցական մարմինները:
Ուստի ստեղծված իրավիճակում պետք է սպասել Պատրիարքարանի պատկան մարմինների որոշման:
Սույն խնդրին անդրադարձ կունենա Գերագույն հոգևոր խորհուրդն իր առաջիկա ժողովին, փետրվարի 20-ին և
կարտահայտի իր դիրքորոշումը»,–ասաց նա:

Հիշեցնենք, որ 2016թ. հոկտեմբերի 26-ին Պոլսո Հայոց պատրիարքարանը հայտարարել էր 9 տարի շարունակ կոմայի մեջ գտնվող պատրիարք Մեսրոպ Մութաֆյանին անգործունյա ճանաչելու որոշման մասին, ինչը ենթադրում էր նոր պատրիարքի ընտրության մեկնարկ, որի համար անհրաժեշտ էր նախ ընտրել Պոլսո Հայոց պատրիարքի նոր տեղապահ, որը կղեկավարեր ընտրական գործընթացը:

2017թ. փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի նոր տեղապահի ընտրություն: Ընտրություններում Արամ արքեպիսկոպոս Աթեշյանին հաղթած Գարեգին արքեպիսկոպոս Բեքչյանը, չնայած Աթեշյանի ու պետության կողմից միջամտություններին, ստանձնել էր Պոլսո Հայոց պատրիարքի տեղապահի պաշտոնը և արդեն ձեռնամուխ էր եղել պատրիարքի ընտրությունների կազմակերպմանը։

http://www.tert.am/am/news/2018/02/08/Aram-ateshyan/2609645

Leave a Reply

Your email address will not be published. Required fields are marked *