Կարո Փայլանին դատախազություն են կանչել՝ Եվրոպայում հայերի և քրդերի դեմ մահափորձերի մասին ցուցմունք տալու


Թուրքիայի
մեջլիսի հայազգի պատգամավոր Կարո Փայլանն Անկարայի դատախազություն է ներկայացել՝ Եվրոպայում հայերի, ալևիների և քրդերի դեմ մահափորձերի նախապատրաստման մասին տեղեկության հիման վրա հարուցված գործի շրջանակներում ցուցմունք տալու: Այս մասին տեղեկացնում է Demokrathaber.org կայքը:

Փայլանի խոսքով՝ տարիներ առաջ գրեթե նույն ձևով սպանվել է պոլսահայ լրագրող, «Ակօս» թերթի խմբագիր Հրանտ Դինքը: Դատարանում Փայլանը նշել է, որ Թուրքիայի պատմության մեջ կա Հրանտ Դինքի սպանության մասին իրականություն: «Այդ շրջանում նա էլ մամուլի ու իշխանությունների կողմից թիրախ դարձավ: Ես ցանկացա, որ լքի երկիրը, սակայն նա մնաց ու սպանվեց: Այժմ էլ քաղաքական գործիչների ու մամուլի կողմից թիրախի տակ են առնվում մի շարք մտավորականներ, նրանց թվում՝ նաև Ջան Դյունդարը: Գերմանիայից տեղեկություններ ստացանք, որ նրանց դեմ մահափորձեր են նախապատրաստվում: Այս թեմայի վերաբերյալ որևէ իրեղեն ապացույց ու փաստաթուղթ չկա, կա բանավոր տեղեկատվություն միայն», – ասել է նա:

Հիշեցնենք, որ ավելի վաղ Կարո Փայլանը հայտարարել էր, որ իրեն տեղեկություններ են հասել այն մասին, որ Թուրքիայից Եվրոպա տեղափոխված մի շարք հայերի, ալևիների, ինչպես նաև թուրք ընդդիմադիր լրագրողների, գրողների ու մտավորականների կյանքին վտանգ է սպառնում: Հայտարարության մեջ մասնավորապես ասվում էր. «Ինձ տեղեկություն է հասել այն մասին, որ Եվրոպայում, հատկապես՝ Գերմանիայում ապրող հայկական ու ալևիական համայնքների ներկայացուցիչների, ինչպես նաև Թուրքիայում ԱԶԿ-ական (Արդարություն և զարգացում կուսակցություն-AKP) իշխանությունների վարած քաղաքականության հետևանքով ստիպված երկրից հեռացած լրագրողների, գրողների, գիտնականների ու հասարակական գործիչների դեմ մահափորձեր են նախապատրաստվում»:

Փայլանը նշել է, որ ահաբեկչությունները պլանավորող խմբերը ուղղորդվում են Թուրքիայից: «Գործ ունենք Թուրքիայի մութ ուժերի կողմից կազմակերպված հանցավոր խմբերի հետ, որոնք պատրաստվում են զինված հարձակումներ կատարել»,- նշել է Փայլանը: Հայ պատգամավորը հայտարարել է, որ տեղեկություններ է ստացել հայտնի անձանց դեմ իրականացվելիք գործողությունների մասին, ինչը կարող է մեծ աղմուկի պատճառ դառնալ: Փայլանը նշել է, որ եվրոպական անվտանգության ծառայությունները լուրջ միջոցառումներ են ձեռնարկել այս տեղեկությունների հիման վրա: «Ես արդեն կառավարությանը և համապատասխան մարմիններին զգուշացրել եմ մեր քաղաքացիների անվտանգությունն ապահովելու համար եվրոպական կառույցների հետ կապ հաստատելու համար: «Արդյո՞ք իրենց երկրում ազատ ապրելու ու արտահայտվելու հնարավորությունից զրկված մեր մտավորականներուն ու լրագրողներին ուզում են ասել, թե կարող են լռեցնել իրենց անկախ նրանից, թե որտեղ են ապրում: Թե՞ խորքային ուժերն են, այս իրավիճակից օգտվելով, կրկին գործի անցել»,- հարց է հղել Փայլանը:

https://shabat.am/am/article/164526/Karo-Paylanin-datakhazutyun-en-kanchel-

Leave a Reply

Your email address will not be published. Required fields are marked *