«Ակօս»-ն արժևորել է Ազգային փոքրամասնությունների վաքըֆների ներկայացուցիչ դոկ․ պրոֆ․ Թորոս Ալջանի պաշտոնավարման 3 տարիները


Կիրակի օրը՝ դեկտեմբերի 24-ին, Անկարայում տեղի են ունենալու
Վաքըֆների գլխավոր խորհրդի ազգային փոքրամասնությունների վաքըֆների ներկայացուցչի ընտրությունները։ Այդ մասին, Akunq.net-ի փոխանցմամբ, հաղորդում է Ստամբուլում հրատարակվող «Ակօս» հայկական շաբաթաթերթը:

Աղբյուրի համաձայն` երեք տարի է, ինչ այդ պաշտոնը զբաղեցնում էր դոկ․ պրոֆ․ Թորոս Ալջանը։ Ակնկալվում է, որ նրան կփոխարինի հրեական համայնքի ներկայացուցիչ Մորիս Լևիսը։ Ալջանը սկսել է պաշտոնավարել 2014 թ․՝ փոխարինելով հույն հայմայնքի ներկայացուցիչ Լաքի Վինգասին, ով մինչ այդ պաշտոնավարել էր երկու շրջան՝ 6 տարի։ Ալջանի պաշտոնավարման շրջանում բազմաթիվ իրադարձություններ են տեղի ունեցել։ Լուծվել է «Արմեն» ճամբարի խնդիրը, Էդիրնեում գտնվող սինագոգը կրկին սկսել է գործել որպես սրբատեղի, առանձին վաքըֆ է ճանաչվել Սուրբ Աստվածածին հայ կաթոլիկ եկեղեցու վաքըֆը։ Այնուամենայնիվ՝ դեռ չեն անցկացվել Վաքըֆի ընտրությունները։

Ալջանն իր պաշտոնավարման վերջին ամսում ասել է․ «Չնայած շատ հոգնեցուցիչ լինելուն՝ հաճելի շրջան էր։ Հատկապես շատ ուրախ եմ, որ Ազգային փոքրամասնությունների վաքըֆների գրասենյակը դարձրեցինք կիսաինստիտուցիոնալ։ Այս գրասենյակը մեզ հատկացրել է Կարագյոզյան հիմնադրամը։ Ինձնից հետո էլ Ազգային փոքրամասնությունների վաքըֆը իր գործունեությունը կշարունակի այստեղ։ Կիսատ են մնացել միայն Վաքըֆի ընտրություններն ու Անարատ Հղություն դպրոցի գործերը, մնացած բոլոր գործերն ավարտին ենք հասցրել։ Երբ Մորիս Լևիսը սկսի իր պաշտոնավարությունը, բոլոր գործերն ու զեկույցները պատրաստ կգտնի։ Այսպիսի արխիվային համակարգը շատ օգտակար կլինի»։

Նա նաև նշել է, որ իր պաշտոնավարաման սկզբում օրակարգի առաջնային հարցերից է եղել «Արմեն» ճամբարի խնդիրը, որի լուծումը շատ ուրախալի է։  Ինչ վերաբերում է ասորական եկեղեցու խնդրին, ապա իրենց պահանջները պետության ու Հուշարձանների խորհրդի կողմից բավարարվել են, սակայն, չնայած բոլոր թույլատվություններին՝ դատական գործ է հարուցվել, որը դեռ շարունակվում է։

Ամենամեծ գործերից մեկը եղել է հայ կաթոլիկ եկեղեցու ճանաչումը որպես առանձին վաքըֆ։ Սուրբ Աստվածածին հայ կաթոլիկ եկեղեցու վաքըֆը դարձել է 167-րդը։ Ապելանդոն վաքըֆը ընտրություններ չէր կարողանում անցկացնել և չէր ճանաչվում: Ապելանդոնն էլ առանձին վաքըֆ դարձավ։ Երկար տարիներ Էդիրներում գտնվող սինագոգը փակ էր։ 2015 թ․ այն կրկին բացվել է որպես սրբատեղի։

Ալջանը խոսել է նաև Վաքըֆի ընտրությունների մասին։ Դրա վերաբերյալ մասնավորապես ասել է, որ այդ ընտրությունների չանցկացվելը մեծ խնդիր է։ Դրա համար բազմաթիվ ժողովներ են անցկացվել, զեկույցներ պատրաստվել։ Նա նշել է նաև, որ անհրաժեշտ բոլոր քայլերն արված են ընտրությունների անցկացման համար։

Ալջանը հանդիպել է նաև փոխվարչապետ Չավուշօղլուի հետ և ընտրությունների հետ կապված` մի շարք առաջարկներով հանդես եկել։ Նա նշել է, որ նորմալ է վերաբերվում այն խոսակցություններին, թե իբր ինքը որևէ գործ չի արել։ Ալջանը շեշտել է, որ իր գործունեությունը չպետք է խառնել քաղաքացիական ակտիվության հետ։

Նա անդրադարձել է նաև Կ.Պոլսո հայոց պատրիարքի  ընտրությունների հարցին, որի վերաբերյալ մասնավորապես նշել է, որ որպես Սուրբ Խաչ եկեղեցու վաքըֆի ղեկավար` վրդովմունքով է հետևում պատրիարքի ընտրությունների հետ կապված իրադարձություններին։ Չնայած ամեն ինչ արված է ըստ կանոնների, սակայն ընտրություններ դեռ չեն անցկացվում, ինչը մտահոգիչ է։

Նա քննադատել է նաև պատրարքի նախկին տեղապահ Արամ Աթեշյանի պահվածքը` մասնավորապես նշելով, որ նրան տեղապահ ընտրողն էլ, տեղապահի պաշտոնից զրկողն էլ Հայ եկեղեցականների խորհուրդն է եղել։ Խորհրդի նկատմամբ անհարգալից վերաբերմունք է այն, որ Աթեշյանը դեռ շարունակում է պնդել, որ որպես տեղապահ է շարունակում ճանաչվել, վեղարէ  հագնում ու այստեղ-այնտեղ գնում։

http://www.agos.com.tr/tr/yazi/19826/vakif-secimleri-icin-her-sey-hazir

Թուրքերեն նյութը և լուսանկարը` Միհրան Մանուկյանի 

Թարգմանեց Անի Մելքոնյանը

Akunq.net

Leave a Reply

Your email address will not be published. Required fields are marked *