Էրտողան Զարրապի դատավարութիւնը Թուրքիոյ դէմ դաւադրութիւն կը համարէ


ՊՈԼԻՍ
, «Մարմարա».- Թուրքիոյ քաղաքական օրակարգը, բառին բուն իմաստով, այս օրերուն կը նմանի խառնարանի մը, ուր զարգացումները կայծակնային արագութեամբ կը յաջորդեն իրարու։ Արդարեւ, լրատուական ռումբեր կը տեղան ամէնուրեք, եւ կարելի չէ գիտնալ՝ ո՞ր լուրին պէտք է հետեւիլ, որո՞ւն մասին կարծիք կազմել, ո՞ր լուրը առաջնահերթ նկատել, կամ ո՞ր լուրին հաւատալ։

Ռեզա Զարրապի դատավարութեան գնացքը կը շարունակէ աղմկայարոյց դէպքերու «առաջատար»ը մնալ։ Թուրքիա-Ամերիկա յարաբերութիւնները երբեք այնքան լարուած չէին եղած, որքան են այս օրերուն, եւ իշխանութիւնները այժմ կշիռքի նժարին վրայ դրած են այն հարցը, թէ Ամերիկա իրօ՞ք ռազմավարական դաշնակից է Թուրքիոյ, թէ ծուղակներ կը լարէ Թուրքիոյ համար։

Սուրիոյ եւ Իրաքի մէջ զարգացումները լաւ բան չեն խոստանար Թուրքիոյ, իսկ ներքին քաղաքական կեանքի մէջ գլխաւոր ընդդիմադիր կուսակցութեան առաջնորդ Քեմալ Քըլըճտարօղլուի՝ իշխանութիւններուն ուղղեալ մերկացումները կու գան հարցականներու նոր շարան մը ստեղծելու մարդոց մօտ։

Առանց որեւէ վերապահութեան կարելի է պնդել, որ Զարրապ դարձած է վկայ մը, որ գլխացաւ է Թուրքիոյ եւ անոր իշխանութիւններուն համար։ Իր վկայութիւնները պայթուցիկի պէս կը հնչեն եւ կ՛ըսուի, թէ անոնք իր խոստովանութիւններու ծրարին ծայրն են միայն։

Այս պայմաններուն տակ եւ իշխող կուսակցութեան խորհրդարանական խմբակցութեան առջեւ իր ելոյթին մէջ, նախագահ Էրտողան երկար խօսեցաւ Զարրապի վկայութեանց եւ դատավարութեան մասին՝ ըսելով, որ այդ դատավարութիւնը ո՛չ մէկ աղերս ունի իրաւական համակարգին եւ առեւտրական մարզին հետ։ Ըստ իրեն՝ Ամերիկա կը փորձէ մէկ քարով քանի մը թռչուն զարնել, որոնց շարքին ամէնէն կարեւորը այս է. «Թուրքիոյ ամբողջ ուշադրութիւնը կեդրոնացնել այդ դատավարութեան վրայ եւ թափ տալ Սուրիոյ ու Իրաքի ապագային առնչութեամբ այն ծրագիրներուն, որոնք ներհակ են Թուրքիոյ ազգային շահերուն»։

Էրտողանի համաձայն՝ դատը Ամերիկայի ներքին քաղաքական կեանքին համար խաղաքարտ ու Թուրքիոյ դէմ դաւադրութիւն մըն է։ Ան խօսքը շարունակեց ըսելով, որ Ամերիկա կը փորձէ Սուրիոյ մէջ իր ծրագիրները իրագործել, բայց Թուրքիա չի կրնար ձեռնածալ դիտել, թէ ինչպէ՛ս «Թուրքիոյ քիթին տակ ահաբեկչական պետութիւն մը կը հիմնուի»։

Asbarez.com

Leave a Reply

Your email address will not be published. Required fields are marked *