Պոլսո Հայոց պատրիարքի տեղապահի պաշտոնում ընտրված Բեկչյանը հանդիպել է հայ համայնքին պատկանող հիմնադրամների նախագահների հետ

Պոլսո Հայոց պատրիարքի տեղապահի պաշտոնում ընտրված Գարեգին արքեպիսկոպոս Բեկչյանը և պատրիարքարանի Եկեղեցական խորհրդի նախագահ Սահակ եպիսկոպոս Մաշալյանը նախօրեին հանդիպում են ունեցել հայ համայնքին պատկանող հիմնադրամների նախագահների հետ, փոխանցում է «Ակօսը»:
Բարձրաստիճան երկու հոգևորականները համայնքի ներկայացուցիչների հետ քննարկել են Պոլսո պատրիարքի ընտրության շուրջ ստեղծված ճգնաժամային իրավիճակը և Թուրքիայում սահմանադրական փոփոխությունների վերաբերյալ հանրաքվեից հետո իրենց անելիքները:
Ժողովից հետո հիմնադրամների նախագահների հրապարակած ընդհանուր հայտարարության մեջ նշվում է, որ առկա խնդիրների անհապաղ լուծման անհրաժեշտության և Ստամբուլի հայ համայնքի`օրինական պատրիարք ընտրելու արդար պահանջի բավարարման հարցում կողմերը համակարծիք են և պատրաստ` միասին առաջնորդելու եկեղեցական կարգին համապատասխան օրինական գործընթացը:
Մեկնաբանելով տեղի ունեցած հանդիպումը` արքեպիսկոպոս Բեկչյանն այն գնահատել է «բավականին դրական»:
«Մենք մտքերի ու կարծիքների փոխանակում արեցինք: Ես նրանց հիշեցրի, որ պատրիարքի ընտրության գործընթացը սկսելու հարցում իրենք պետք է առավել ակտիվ ու կառուցողական դիրքից հանդես գան», – ասել է Բեկչյանը:
Հիշեցնենք, որ փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի տեղապահի ընտրություն: Ընտրությունից հետո, որում համոզիչ հաղթանակ էր տարել Բեկչյանը, Ստամբուլի նահանգապետարանն անակնկալ կերպով միջամտել էր ընտրություններին: Ստամբուլի նահանգապետի տեղակալը, նախքան պատրիարքարանում ընտրությունների սկսվելը, գրություն էր ուղարկել, որն իրավաբանորեն անհնար էր համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին էր ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:
Պոլսո պատրիարք Մեսրոպ Մութաֆյանը կոմայի մեջ է գտնվում 2008թ. և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված էր ոչ թե համայնքի, այլ պետության կողմից:
Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշում՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ` իրենց ձայների արդյունքում ընտրված անձի:

http://www.tert.am/am/news/2017/04/20/bekchyan/2347068

Leave a Reply

Your email address will not be published. Required fields are marked *