Ստամբուլի հայությունը պատրիարքի ընտրության նախաշեմին. համայնքային ժողովն անցել է լարված մթնոլորտում

Նախօրեին Ստամբուլում հայկական համայնքային հիմնադրամների նախագահների և բարերարների մասնակցությամբ կայացած ժողովն անցել է բավականին լարված պայմաններում:

Ինչպես հայտնում է «Ակօսը», եկեղեցական խորհրդի նախագահ արքեպիսկոպոս Սահակ Մաշալյանի հրաժարականի հայտարարության և պատրիարքի փոխանորդ Արամ Աթեշյանին ուղղված մեղադրանքների առիթով հրավիրված ժողովի ընթացքում համայնքի ներկայացուցիչների մի մասը տեղում պահանջել է Աթեշյանի հրաժարականը:

Միևնույն ժամանակ համայնքի ակտիվիստները, եկեղեցու բակում հավաքվելով, պահանջել են ներկա գտնվել ժողովին: Նրանցից մի քանիսին հաջողվել է ներս մտնել: Պարբերականի փոխանցմամբ՝ ընթացքում պարզ է դարձել, որ Աթեշյանին աջակցող ժողովի որոշ մասնակիցներ, այդ թվում` Սուրբ Փրկիչ հիվանդանոցի հոգաբարձուների խորհրդի նախագահ Պետրոս Շիրինօղլուն, ով պատրիարքի ընտրության հարցը քննարկման էր դրել Թուրքիայի նախագահ Ռեջեփ Թայիփ Էրդողանի հետ հանդիպման ժամանակ, պատրաստվում էին գումարված ժողովից դուրս մեկ այլ, գաղտնի ժողով անցկացնել և փոխել իրադարձությունների ընթացքը: Որպես բողոքի նշան՝ համայնքի մի շարք ականավոր ներկայացուցիչներ ցանկացել են լքել սրահը:

Թուրքիայի ընդդիմադիր Ժողովրդահանրապետական կուսակցության անդամ, Մեջլիսի հայազգի պատգամավոր Սելինա Դողանը, խոսելով անցկացված ժողովի մասին, նշել է, որ այս ընթացում համայնքի համար անհրաժեշտ է կառուցողական ու կայուն որոշում կայացնել, որը կհարթի եղած խնդիրները:

«8 տարի է` անկայունություն է գործում համայնքի ներսում: Այսպիսով գոնե ինչ-որ մի ճանապարհ է բացվում համայնքի առաջ»,- ասել է Ֆերիքյոյի հայկական եկեղեցու հիմնադրամի նախագահ Մուրադ Օյերը:

Ինչպես ավելի վաղ հայտնել է Tert.am-ը նախօրեին գումարված արտակարգ ժողովում որոշում է կայացվել նոր պատրիարքի ընտրությունները անցկացնել մայիսի 28-ին, ընդ որում, ընտրությունների անցկացման համար համայնքը չի պատրաստվում սպասել Թուրքիայի նախագահ Ռեջեփ Թայիփ Էրդողանի միջամտությանը:

Հիշեցնենք, որ դեռևս հոկտեմբերին Պոլսո Հայոց պատրիարքարանը հայտարարել է ներկայիս պատրիարք Մեսրոպ Մութաֆյանին պաշտոնանկ անելու և պատրիարքի նոր ընտրություններ անցկացնելու որոշման մասին: Ընտրությունների ամսաթվի նշանակումը պարբերաբար ձգձգվում էր հանրության համար անհայտ պատճառներով:

Նշենք, որ պատրիարք Մութաֆյանը կոմայի մեջ է գտնվում 2008 թ-ից և փաստացի չի գործում որպես պատրիարք: Նրա փոխարեն այդ լիազորությունները կատարում է արքեպիսկոպոս Արամ Աթեշյանը, որն ընտրված է ոչ թե համայնքի, այլ պետության կողմից:

Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշումը՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի:

http://www.tert.am/am/news/2017/02/17/mashalyan-ateshyan/2281539

Leave a Reply

Your email address will not be published. Required fields are marked *