Մենք` հատկապես հոգևոր առաջնորդներս, աշխարհիկ պատասխանատուների հետ միասին հավասարապես մեղավոր ենք Պոլսում տիրող այս անկարգությունների համար

Գուգարաց թեմի առաջնորդ Սեպուհ արքեպիսկոպոս Չուլջյանն արձագանքել է Պոլսո հայոց պատրիարքարանի շուրջ տիրող լարված մթնոլորտին: Հիշեցնենք, որ Սեպուհ Չուլջյանը Պոլսո պատրիարքի թեկնածուներից մեկն է

Իմ հոգևոր եղբոր` Սահակ Սրբազանի զայրութն ու այս ծայրահեղ որոշումը ևս մեկ անգամ ահազանգ է` բարձրացված պոլսահայության և հոգևոր դասի առջև ծառացած բազմաթիվ խնդիրների վերաբերյալ: Հուսով եմ` սա լինելու է ոչ թե իր ձևակերպմամբ «պարտության ճիչ», այլ սթափության կոչնակ: Վիճակը թույլատրելիի ու անթույլատրելիի սահմանագիծը վաղուց է հատել: Համայն հայությունը ութ տարի շարունակ ծով համբերությամբ հետևում է Արամ արքեպիսկոպոս Աթեշյանի կամակորություններին և անձնական ամբիցիաներով պայմանավորված խաղերին:

Իբրև իմ կրտսեր եղբորը` Սահակ Սրբազանին, հորդորում եմ այս խայտառակությունների համար չմեղադրել մեր բարեպաշտ ժողովրդին ու չնեղանալ նրանցից: Մենք` հատկապես հոգևոր առաջնորդներս, աշխարհիկ պատասխանատուների հետ միասին հավասարապես մեղավոր ենք Պոլսում տիրող այս անկարգությունների համար: Ի վերջո, մենք հաշվետու ենք նաև այն հավատավոր համայնքի առջև, ում ծառայությանն ենք կոչված, այլ ոչ թե առանձին անձանց անհիմն փառասիրությամբ պայմանավորված խարդավանքների: Նաև կոչ եմ անում համայնքի հոգևոր և աշխարհիկ շրջանակներին` համախմբվել և սատարել ոչ թե անձին, այլ այն կարևոր նպատակին ու խնդրին, որն արդեն ահագնացող չափերի է հասել:

Չեմ կարող չանդրադառնալ իմ մյուս հոգևոր եղբոր` Արամ Աթեշյանի պահվածքին և նկատել, որ պատրիարքության շուրջ շարունակ ծավալվող սկանդալները, բանավեճերը ուղղակիորեն կապված են իր անվան հետ, և նա պետք է կարողանա ի վերջո իր մեջ ուժ գտնել հստակ եզրակացության գալ և անել այն քայլերը, որոնք պարտավոր էր անել դեռևս տարիներ առաջ: Ուզում եմ շեշտել, որ պատրիարքի ընտրության հարցը անձերի կամ անձնական շահերի հարց չէ, սա համաեկեղեցական և համազգային հարց է: Սա չգիտակցելը անթույլատրելի է և պատճառ է դառնում նմանատիպ ողբերգական զարգացումների:

Ուստի Կոստանդնուպոլսի հայոց պատրիարքության դարավոր փառքն ու պատիվը առաջնային նկատելով` նախանձախնդիր ոգով հորդորում եմ, ի սեր պոլսահայության, վերջ տալ կամակորություններին ու անձնական բարդույթներին և նախաձեռնել պատրիարքական ընտրությունները:

Սեպուհ արքեպիսկոպոս Չուլջյան

Առաջնորդ Գուգարաց թեմի

Arevelk.am

Leave a Reply

Your email address will not be published. Required fields are marked *