«Գորշ գայլերը» սպառնում են սպանել Հայոց ցեղասպանության զոհերի հիշատակը ոգեկոչողներին

Թուրքիայում ազգայնական շրջանակների ներկայացուցիչները սպառնում են սպանել ապրիլի 24-ին Ստամբուլում Հայոց ցեղասպանության զոհերի հիշատակին նվիրված միջոցառումների կազմակերպիչներին:

Firat գործակալության փոխանցմամբ` Մարդու իրավունքների պաշտպանության միության Ստամբուլի մասնաճյուղի ներկայացուցիչներին սկսել են սպառնալ այն բանից հետո, երբ վերջիններիս նախաձեռնությամբ միջոցառում էր կազմակերպվել Ստամբուլում` ի հիշատակ 1915թ. ապրիլի 24-ին սպանված հայ մտավորականների:

Firat-ի հետ հարցազրույցում կազմակերպության քարտուղար Բաքի Բողան հայտարարել է, որ իրենք ստանում են բազմաթիվ էլեկտրոնային նամակներ՝ մահվան սպառնալիքներով և վիրավորանքներով:

«Անցած տարի Հայոց ցեղասպանության տարելիցի առնչությամբ նույնպես հանդես էինք եկել հայտարարությամբ և ստանում էինք սպառնալիքներով նամակներ: Սակայն այս տարի սպառնալիքների թիվը բազմապատկվել է»,- նշել է Բողան` ավելացնելով, որ իրենք պատրաստվում են հայց ներկայացնել դատարան` ընդդեմ իրենց հասցված վիրավորանքների և սպառնալիքների հասցեատերերի:

«Մենք առայժմ չենք ուսումնասիրել մեզ ուղարկվող նամակների աղբյուրը: Սակայն միանշանակ կարելի է ասել, որ դրանց բովանդակությունը գաղափարական առումով համապատախանում է «Գորշ գայլեր» ծայրահեղական կազմակերպությանը»,- հայտարարել է թուրք իրավապաշտպանը` 1915թ. իրադարձությունները ևս մեկ անգամ որակելով որպես Ցեղասպանություն:

«Ցեղասպանության ժամանակ մեկ միլիոնից ավելի մարդ է սպանվել: Որևէ նշանակություն չունի` այդ սպանությունները թուրքերի՞, թե՞ քրդերի ձեռքով են իրականացվել: Կարևորն այն է, որ դա իրականացվել է պետության կողմից հատուկ հրահանգով»,- նշել է Բաքի Բողան:

Tert.am, 28.04.10