Ստամբուլում կբացվի միջնադարյան հայ ճարտարապետ Սինանի անվան մզկիթ

Ստամբուլում հուլիսի 20-ին շահագործման կհանձնվի Օսմանյան կայսրության հանճարեղ հայ ճարտարապետ Սինանի անվան մզկիթ: Այդ մասին, ինչպես հաղորդում է «Արմենպրես»-ը, հայտնում է «Անադոլու» լրատվական գործակալությունը:

Մզկիթի նախագծի հեղինակը ճարտարապետ Մուհառեմ Հիլմի Շենալփն է: Նրա նախագծերով մզկիթներ են կառուցվել Աշխաբադում, Տոկիոյում, Բեռլինում: Մզկիթի նախագծում հեղինակը պահպանել է Օսմանյան կայսրությունում ճարտարապետության հիմնադիր Սինանի ստեղծած դասական ոճը, որը ժամանակակից թուրքերը համարում են իրենցը: Երկու տարի տևած շինարարության վրա աշխատել են մոտ 500 բանվորներ եւ մասնագետներ, ծախսվել է 40 մլն թուրքական լիրա (մոտ 25 մլն ԱՄՆ դոլար): Ճարտարապետ Սինանի անվան մզկիթը շրջապատված է 46 հազար քմ տարածք զբաղեցնող պուրակով, որի տարածքում տեղադրվել են Օսմանյան կայսրությունում Սինանի կառուցած շինությունների լուսանկարները:

92 տարի ապրած Սինանի ստեղծած 84 մեծ եւ 52 փոքր մզկիթները, 57 մեդրեսեները (կրոնական դպրոց), 22 դամբարանները, 17 բարեգործական շինությունները, 3 հիվանդանոցները, 5 ջրատարները, 8 կամուրջները, 20 իջեւանատները, 36 պալատներն ու 48 բաղնիքները կազմում են Օսմանյան կայսրության դասական ճարտարապետության գլուխգործոցները:

http://armenpress.am/arm/news/688242/stambulum-kbacvi-mijnadaryan-hay-tchartarapet-sinani.html