Թուրքական արդարադատությունը ոչ մի պատիժ չի սահմանել Թուրքիայի հայ քաղաքացի Եվա Աքսոյին սպառնացած անձանց համար, ովքեր նրան ասել էին. «Մեր երկիրը նեղ կգա քեզ համար» և «Քո վերջը կախաղանը կլինի»:
Թուրքական «Թարաֆ» օրաթերթի փոխանցմամբ` «Կենդանիների ապրելու իրավունքների պահպանման միության» նախագահ Աննա Եվա Աքսոյի դեմ ուղղված սպառնալիքների կապակցությամբ հարուցված դատական գործը կարճվել է` «Երրորդ դատական փաթեթի» շրջանակներում: Համաձայն որոշման` եթե մեղադրյալ Մեհմեդ Ալի Օզարըքչան երեք տարվա մեջ դիտումնավոր կերպով նույն հանցանքը գործի, նրա գործը կվերանայվի:
Ստամբուլի 10-րդ հաշտարար դատարանի կողմից քննված գործի` երեկ կայացած նիստին մասնակցել է ամբաստանյալ Մեհմեդ Ալի Օզարըքչան: Դատական նիստին ելույթ ունեցած Աքսոյի փաստաբան Ֆազըլ Ահմեդ Թամերը հայտնել է, թե հաստատվել է, որ Աքսոյի էլեկտրոնային հասցեին ուղարկված սպառնալիքներ պարունակող նամակները գրվել են ամբաստանյալի կողմից: Դա ընդունել է նաև մեղադրյալը: Սակայն դատարանը գործը կարճելու որոշում է կայացրել: Աքսոյի փաստաբանը հայտարարել է, թե բողոքարկելու է դատարանի վճիռը:
Akunq.net
Facebook