Կիպրոսի թուրքական եւ հունական մասերի բնակիչների միջեւ անշարժ գույքի փոխանակում է կատարվել

Կիպրոսի Հանրապետության ղեկավարությունը համաձայնել է կղզու բռնազավթած թուրքական մասում հույների թողած անշարժ գույքը փոխանակել հունական մասում թուրքերին պատկանող հողատարածքներով:

Ինչպես հաղորդում է «Արմենպրես»-ը, թուրքական TRT հեռուստաալիքը «պատմական» է բնութագրել իրադարձությունը` նշելով, որ դրանով սկիզբ է դրվում 1974 թ. Կիպրոսի եւ Թուրքիայի միջեւ պատերազմում հույն եւ թուրք քաղաքացիների թողած անշարժ գույքի հետ կապված խնդրի լուծմանը:

Թուրքական հեռուստաալիքը հայտնել է, որ առաջին դեպքն է, երբ կղզու թուրքական հատվածում Միկա Տիմվիոսի անշարժ գույքը պաշտոնապես փոխանակվում է հունական մասում թուրք բնակչի հողատարածքի հետ, ինչին հունական կողմն ավելի վաղ չէր համաձայնվում:

Կիպրսի վերամիավորման շուրջ թուրքական եւ հունական հատվածների միջեւ շարունակվող բանակցություններում բնակչության անշարժ գույքի հարցն առաջնային եւ անլուծելի թվացող խնդիր էր: Թուրքական կողմը մշտապես առաջարկում էր այն լուծել փոխանակումների եւ փոխհատուցումների միջոցով:

http://armenpress.am/arm/news/687146/kiprosi-turqakan-ev-hunakan-maseri-bnakichneri-mijev.html