Թուրքական մամուլը Անին «փրկել» է հայերից

Թուրքական մամուլը փորձում է Հայաստանի վրա բարդել Անիի ավերակների քայքայման և ոչնչացման գործընթացը:

Թուրքական «Աքշամ» պարբերականում տեղ գտած հոդվածում նշվում է, թե իբր Հայաստանի քարհանքերի պայթեցումները վնասում են Անին, սակայն այժմ միջազգային կազմակերպությունների միջամտությամբ հաջողվել է «փրկել քաղաքը»:

«Թուրքիայի և Հայաստանի միջև «դինամիտային ճգնաժամը» լուծված է: Հայաստանում` Անիից ոչ շատ հեռու գտնվող քարհանքերում, պայթյունները դադարեցվել են: Այս ամենն արդյունք է Համաշխարհային ժառանգության հանձնաժողովի աշխատանքների»,-գրում է «Աքշամը»:

Թուրքական թերթը պնդում է, թե Համաշխարհային ժառանգության հանձնաժողովին է դիմել Թուրքիայի մշակույթի նախարարությունը, և խնդրանքի հիման վրա Հայաստանի հետ բանակցություններ են տեղի ունեցել, ինչն ավարտվել է հաջողությամբ:

Իհարկե, թուրքական սովորույթների համաձայն, հոդվածի հեղինակը միայն վերջում իմիջիայլոց նշում է, թե «Անին եղել է հայ տիրակալների մայրաքաղաքը 961-1045 թվականներին»:

http://haynews.am/hy/1340736088