Թուրքիայի պատմագիտական ընկերության նախագահ է նշանակվել հակահայ Մեհմեդ Հյուլագուն

Թուրքիայի պատմագիտական ընկերության նախագահ է նշանակվել հակահայ հրապարակումներով հայտնի, Էրջիեսի համալսարանի ռեկտորի տեղակալ Մեհմեդ Մեթին Հյուլագուն: Այս մասին, ինչպես հաղորդում է «Արմենպրես»-ը, հայտնում է թուրքական ntvmsnbc.com լրատվական կայքը:

Ըստ կայքի` Հյուլագուն Հակական հարցի, Հոլոքոստի եւ քաղաքական պատմության մասնագետ է: Նա է հեղինակել «Հանդուրժող հասարակության մեջ հայերը» եւ «Հանդուրժողականությունից հեռացած հայերը» հակահայ գրքերի 4 հատորյակները:

1992 թ. դոկտորական թեզ պաշտպանած 50-ամյա թուրք «գիտնականը» նույն թվականից աշխատում է Էրջիեսի համալսարանում: Թուրքիայի պատմագիտական ընկերության նախագահի պաշտոնում նշանակված Հյուլագուն դեռեւս դասախոսում է Էրջիեսի համալսարանի պատմության ֆակուլտետում, հանդիսանում է նույն համալսարանի ռազմավարական հետազոտությունների կենտրոնի տնօրենը եւ շարունակում է զբաղեցնել նաեւ այդ համալսարանի ռեկտորի տեղակալի պաշտոնը:

Թուրքիայի պատմագիտական ընկերության` Հայկական հարցի հետ կապված շինծու եւ մտացածին հրապարակումները դարձել են Հայոց ցեղասպանության ժխտողականության հարցում Թուրքիայի պաշտոնական դիրքորոշման հիմքը:

http://armenpress.am/arm/news/685871/turqiayi-patmagitakan-ynkerutyan-nakhagah-e-nshanakvel.html