Մեծ Բրիտանիան այն եզակի երկրներից է, որ չի ճանաչում Հայոց ցեղասպանությունը, սակայն բանաձև է ընդունել հայկական ջարդերը դատապարտելու մասին: Ինչպես փոխանցում է «Արմենպրես»-ը, այս մասին գրում է Le Parisien-ը՝ «Ինչու՞ անգլիացիները չեն ճանաչում Հայոց ցեղասպանությունը» վերտառությամբ հոդվածում:
«Մեծ Բրիտանիայում Հայոց ցեղասպանության հարցը տաբու է: Բրիտանացի գիտնականները բավականին հետաքրքրական վարք են ցուցաբերում այս հարցի առնչությամբ. նրանք չեն օգտագործում «ցեղասպանություն» բառը, այլ նախընտրում են «1915-1923 թվականների իրադարձություններ» արտահայտությունը»,- գրում է թերթի հոդվածագիր Ժուլյեն Լորանսը:
Նրա ներկայացմամբ՝ անգլիական դիրքորոշումը պատմության արդյունք է: «Հայկական ջարդերի ժամանակ բրիտանական զորքերը ներառված են եղել Դարդանելի ճակատամարտում: Ռազմական «վատ» հիշողությունները Բրիտանիայում մեղքի զգացում են առաջացնում»,- նշում է Լորանսը:
Մյուս պատճառը դիվանագիտական է:
Le Parsien-ը շարունակում է պարզաբանել՝ թուրք-ֆրանսիական հարաբերությունները միշտ հրաշալի են եղել: Դեյվիդ Քամերոնը վարչապետ ընտրվելուց հետո իր առաջին այցը կատարել է Թուրքիա՝ հանդիպելու «իր ընկեր» Ռեջեփ Թայիփ Էրդողանին: Մեծ Բրիտանիայում կա նշանակալի թուրքական համայնք՝ շուրջ մեկ միլիոն մարդ: Երկու երկրների մեջ կան նաև էական տնտեսական կապեր:
«Մեծ Բրիտանիայում տնտեսական և պատմական գործընկերների հետ հանդարտ հարաբերությունների պահպանումն ավանդույթ է: Ազգային շահը միշտ գերակայում է ամեն ինչի նկատմամբ: Սակայն եթե Թուրքիան մեկ օր ճանաչի Հայոց ցեղասպանությունը, ապա մենք կհետևենք նրան»,- այսպես է հարցը մեկնաբանում Հայաստանում Մեծ Բրիտանիայի նախկին դեսպան Դեյվիդ Միլլերը:
Սակայն Մեծ Բրիտանիայում ավելի ու ավելի լսելի են դառնում Հայոց ցեղասպանության ճանաչմանն ուղղված ձայները: «2010-ին բարոնուհի Քոքսի ազդեցությամբ Շոտլանդիայի և Հյուսիսային Իռլանդիայի խորհրդարանները Ցեղասպանությունը դատապարտող բանաձևեր են ընդունել»,- եզրափակում է Լորանսը:
http://armenpress.am/arm/news/679712/inchu-angliacinery-chen-tchanachum-hayoc-cexaspanutyuny.html
Facebook